ABŞ-də beynəlxalq tələbələrin sayı ilə bağlı son illərdə yayımlanan rəqəmlər real vəziyyəti tam əks etdirmirmiş. Təhlükəsizlik Nazirliyinin tabeliyində fəaliyyət göstərən SEVIS (Student and Exchange Visitor Information System) sistemində aparılan yenilənmələr nəticəsində məlum olub ki, ölkədəki xarici tələbə sayı əvvəlkindən təxminən 203 min nəfər daha çoxdur.
AzEdu.az xarici mənbədən aldığı məlumata görə xəbər verir ki, yeni hesablamalara əsasən, ABŞ-də hazırda 1,3 milyon əcnəbi tələbə təhsil alır. Bu, əvvəlki illərlə müqayisədə 26 faiz artım deməkdir. Məlum olub ki, əvvəllər bəzi qısamüddətli proqramlar, ingilis dili kursları və qeyri-ənənəvi təhsil formaları statistikaya düzgün daxil edilməyib.
Ekspertlər bildirirlər ki, bu düzəliş beynəlxalq təhsil bazarının real miqyasını göstərmək baxımından mühüm əhəmiyyət daşıyır. ABŞ-nin ən çox tələbə cəlb edən universitetləri – New York University, Columbia University və USC – bu artımı daha əvvəl hiss etsə də, rəsmi rəqəmlərdə əks olunmamışdı.
Təhsil siyasəti sahəsində çalışan mütəxəssislər bu yeniliyin bir sıra sahələrə təsir edəcəyini bildirirlər:
- Viza və immiqrasiya proseslərində yenidən qiymətləndirmələr aparıla bilər;
- Universitet büdcələşməsi və tələbə dəstəyi mexanizmləri yeni göstəricilərə uyğunlaşmalıdır;
- ABŞ-yə qarşı “xarici tələbə axını azalıb” iddiaları da bu statistika ilə təkzib olunmuş olur.
Hazırda ABŞ beynəlxalq tələbələr üçün yenidən ən cəlbedici təhsil mərkəzlərindən biri statusunu möhkəmləndirir. Göstəricilər pandemiyadan sonra tələbələrin ABŞ-yə marağının azalmadığını, əksinə artmaqda olduğunu sübut edir.
