ETN İnformasiya Texnologiyaları İnstitutunun doktorantı Orxan Vəlixanlının müəllifi olduğu "Pilotsuz Uçuş Aparatlarının Yerüstü İdarəetmə Sistemində təsvirlərin analizi əsasında zərərli proqramların aşkarlanması” (Detection of malware in ground control stations of unmanned aerial vehicles based on image processing) adlı məqalə “Inderscience” nəşriyyatında dərc olunan “International Journal of Information and Computer Security” jurnalında çap olunub.
İnstitutdan AzEdu.az-a bildirilib ki, məqalədə YİS-ləri hədəf alan müxtəlif növ zərərli proqramların aşkarlanması üçün hibrid yanaşma təklif edilib.
Təklif olunan hibrid yanaşma konvalyusiya (bükülmə) neyron şəbəkəsinin bir növü olan ResNet-50 və dayaq vektorları metoduna əsaslanır. Tədqiqatlar zamanı iki müxtəlif mənbədən olan verilənlərdən – “Microsoft” şirkəti tərəfindən yaradılan “BIG 2015” verilənlər bazası və “MalwareBazaar” saytından əldə olunmuş zərərli proqram nümunələrindən istifadə edilib. Aparılmış tədqiqatlar nəticəsində 98,62%-lik aşkarlama dəqiqliyi əldə edilib.
Qeyd edək ki, “International Journal of Information and Computer Security” jurnalı “Scopus” və “Web of Science” bazalarında indeksləşir.
