Çağdaş Azərbaycan musiqisinin görkəmli nümayəndələrindən olan istedadlı bəstəkar, sənətşünas alım Rəhilə Teymur qızı Həsənova dünyasını dəyişib.
AzEdu.az xəbər verir ki, 73 yaşlı bəstəkar avqustun 10-da ABŞ-da vəfat edib.
O, bir sıra elmi məqalələrin, dərs vəsaitlərinin (o cümlədən, “Solfecio” müəllif dərsliyinin), monoqrafiyaların müəllifidir. 2005-ci ildə “Musiqi nəzəriyyəsi fənlərarası tədqiqat obyekti kimi” mövzusunda dissertasiya müdafiə edərək sənətşünaslıq üzrə fəlsəfə doktoru elmi dərəcəsi alıb.
2009-cu ildən ABŞ-da yaşayan R.Həsənova burada da bəstəkar və pedaqoq kimi fəaliyyətini davam etdirib.
R.Həsənovanın əsərləri vətənindən kənarda – ABŞ, İngiltərə, Almaniya, Avstriya, İtaliya, Fransa, İsveçrə, Rusiya, Ukrayna, Hollandiya, Yaponiya, İsrail və başqa ölkələrdə ifa olunur, nüfuzlu beynəlxalq festivalların proqramına daxil edilir. ABŞ, Böyük Britaniya, Almaniya və Polşada bəstəkarın müəllif konsertləri böyük uğurla keçirilib. 2004-cü ildə Almaniyada “Dərviş” adlı kompakt-diski işıq üzü görüb.
O, janr və formaları geniş əhatə edən 3 simfoniyanın, "Dərviş", "Mərsiyə", "Səma", 3 simli kvartetin, fortepiano üçün "A la Meykhana" fantaziyasının, orqan üçün "Qəsidə" simfoniyasının, "Mahnılı nağıllar" uşaq operasının, "Pirəbədil", böyük simfonik orkestr üçün "Gecə", orqan üçün "Səhra" fantaziyalarının, "Cavidi-dəstgah" xor operasının, "Müğfil", "Zərrə", "Nüvə" adlı əsərlərin müəllifidir.
