Birləşmiş Krallıqda məktəb binalarının dizaynına yanaşmada ciddi dəyişikliklər edilir. Yeni yanaşmada tədris mühitinin şagirdlərin rifahı və akademik göstəricilərinə təsiri əsas götürülür.
AzEdu.az xarici mənbədən aldığı məlumata əsasən xəbər verir ki, həyata keçirilən proqram çərçivəsində məktəblərdə işıqlandırma, akustika və məkan üçün daha uyğun və inklüziv mühitlərin yaradılmasını hədəfləyir.
Məqsəd sadəcə vizual olaraq müasir məktəblər yaratmaq deyil, eyni zamanda şagirdlərin emosional rahatlığını və öyrənməyə olan diqqətini artırmaqdır. Araşdırmalara görə, təbii işıqla zəngin sinif otaqları və səs izolyasiyası olan məkanlar uşaqların stress səviyyəsini azaldır və akademik nailiyyətlərini artırır.
Mütəxəssislər bildirirlər ki, təhsilin keyfiyyətini artırmaq üçün yalnız kurikulum yox, məkanın özü də dəyişməlidir. Yeni layihələrin bəzilərində açıq hava sinifləri, sakit zonalar və sensor otaqlar kimi yeniliklər nəzərdə tutulur.
Hazırda bu təşəbbüs pilot məktəblərdə sınaqdan keçirilir və nəticələrə əsasən ölkə üzrə yayılması planlaşdırılır.
