2025-də İspaniya hökumətinin qəbul etdiyi yeni çərçivə ölkədə yeni universitetlərin və ali təhsil mərkəzlərinin yaradılması prosesini əvvəlkindən xeyli sərtləşdirir.
AzEdu.az xarici KİV-ə istinadən xəbər verir ki, Ssənədə əsasən, bundan sonra istər dövlət, istərsə də özəl qurumlar yalnız geniş akademik potensial, güclü elmi-tədqiqat infrastrukturu və uzunmüddətli maliyyə dayanıqlığı sübut olunduğu halda yeni universitet təsis edə biləcəklər. Hökumət bununla təhsil sektorunda “tezdən açılıb tez bağlanan”, zəif maddi-texniki baza və minimal akademik kadr resursu ilə fəaliyyət göstərən ali məktəblərin qarşısını almağı hədəfləyir.
Yeni qaydalara uyğun olaraq, yaradılacaq universitetlər ən azı bir neçə bakalavr və magistr proqramı üzrə davamlı tədris təmin etməli, tam ştatlı professor-müəllim heyətinin müəyyən hissəsi doktorluq dərəcəsinə malik olmalı və akkreditasiya agentliklərinin ANECA və ya regional akkreditasiya qurumlarının müsbət rəyini almalıdır. Bundan əlavə, universitetlərin tədqiqat fəaliyyəti üçün laboratoriyalar, kitabxana fondu, rəqəmsal resurslar və innovasiya layihələrini dəstəkləyən strukturlar yaratması məcburidir. Qanunvericilik həmçinin tələbə sayı üçün minimum hədd müəyyən edir ki, bu da təhsil müəssisələrinin real tələb təklifinə əsaslanaraq fəaliyyət göstərməsini təmin etməyi məqsəd qoyur.
Hökumət rəsmiləri bildirirlər ki, bu çərçivənin tətbiqi ali təhsilin keyfiyyətini artıracaq, akademik standartları yüksəldəcək və İspaniyanın universitet sistemini uzunmüddətli perspektivdə daha rəqabətqabiliyyətli edəcək. Yeni tələblər həmçinin universitetlərin cəmiyyətə bilik transferi, innovasiya layihələrində iştirak və regional inkişaf üçün real töhfə verməsi kimi öhdəlikləri də gücləndirir. Bu islahat İspaniyada ali təhsil məkanının daha ciddi, şəffaf və keyfiyyət yönümlü şəkildə formalaşması üçün yeni mərhələ hesab olunur.
