Böyük Britaniyada ali təhsil sektorunda yeni struktur dəyişiklikləri gündəmə gəlib. Təhsil ekspertlərinin və universitet rəhbərlərinin iştirakı ilə bəzi ali məktəblər arasında birləşmə və “super-universitet” modellərinin yaradılması müzakirə olunur.
AzEdu.az xarici KİV-ə istinadən xəbər verir ki, bu təşəbbüsün əsas məqsədi universitetlərin resurslarını birləşdirmək, elmi tədqiqat gücünü artırmaq və beynəlxalq rəqabətdə daha güclü mövqe qazanmaqdır. Yeni model çərçivəsində kiçik və orta ölçülü universitetlərin daha böyük akademik mərkəzlərə inteqrasiya olunması nəzərdən keçirilir.
Mütəxəssislər bildirirlər ki, bu dəyişikliklər universitetlərin idarəetməsini daha səmərəli edə bilər, eyni zamanda tədris keyfiyyətinin və elmi araşdırmaların səviyyəsinin yüksəlməsinə şərait yarada bilər. Bununla belə, bəzi akademik dairələr universitetlərin kimliyinin və müstəqilliyinin itirilməsi ilə bağlı narahatlıqlarını da ifadə edirlər.
Təklif olunan “super-universitet” modeli ilə bağlı müzakirələrin yaxın aylarda daha da intensivləşəcəyi gözlənilir.
