Dünyada universitetlər yalnız təhsil və elmi tədqiqat mərkəzləri deyil, eyni zamanda minlərlə gəncin bir araya gəldiyi, fikir mübadiləsi apardığı və gələcəyini formalaşdırdığı mühüm ictimai məkanlardır. Lakin bəzən bu təhlükəsiz sayılan mühitlər terror və silahlı zorakılıq hallarının hədəfinə çevrilir. Belə faciələr təkcə konkret ölkəni deyil, bütün beynəlxalq ictimaiyyəti sarsıdır, ali təhsil ocaqlarında təhlükəsizlik məsələsini yenidən gündəmə gətirir.
AzEdu.az müxtəlif ölkələrin universitetlərində baş vermiş ən səs-küylü və ağır nəticələrə səbəb olan terror hadisələrini araşdırıb.
ABŞ-də universitet səviyyəsində baş vermiş ən böyük terror aktı 16 aprel 2007-ci ildə Virginia Tech Universitetində qeydə alınıb. Bu hadisə ABŞ tarixində ali təhsil müəssisəsində baş vermiş ən ölümcül silahlı hücum hesab olunur. Hücumçu, universitetin tələbəsi olan Seung-Hui Cho idi. O, iki mərhələdə atəş açıb: əvvəlcə yataqxana binasında, daha sonra isə Norris Hall tədris korpusunda.
Nəticədə 27 tələbə və 5 müəllim olmaqla ümumilikdə 32 nəfər həlak olub, 23 nəfər yaralanıb. Hücumçu daha sonra özünü öldürüb və bununla da ümumi ölüm sayı 33 nəfərə çatıb.
Böyük Britaniyada universitet mühiti ilə əlaqələndirilən ən böyük terror aktı kimi 2017-ci ildə baş verən Mançester Arena partlayışı göstərilir. Hadisə birbaşa universitet binasında törədilməsə də, ölən və yaralananların əhəmiyyətli hissəsinin universitet tələbələri olması şəhərin ali təhsil mühitinə ciddi təsir göstərib.
Terror aktı 22 may 2017-ci ildə İngiltərənin Mançester şəhərində, Ariana Grande konsertindən sonra baş verib. Salman Abedi tərəfindən törədilən partlayış nəticəsində 22 nəfər həlak olub, 800-dən çox insan müxtəlif dərəcəli xəsarət alıb. Rəsmi məlumatlara görə, onlardan 116 nəfəri ağır yaralanıb.
Türkiyədə universitetlə bağlı ən böyük terror hadisələrindən biri 17 fevral 2008-ci ildə İstanbul Universitetinin Beyazıt kampusunun əsas giriş qapısı yaxınlığında baş verib. Həmin gün səhər saatlarında, universitetə daxil olmağa hazırlaşan tələbələrin sıx olduğu vaxtda partlayıcı qurğu işə salınıb.
Hadisə nəticəsində 17 nəfər həyatını itirib, rəsmi məlumatlara görə 154 nəfər yaralanıb. Ölənlərin əksəriyyətini universitet tələbələri təşkil edib. Yaralılar ətraf xəstəxanalara çatdırılıb, onların bir çoxu ağır xəsarətlər alıb.
Azərbaycan da 2009-cu il 30 aprel tarixində Bakıda fəaliyyət göstərən Azərbaycan Dövlət Neft Akademiyasında ağır silahlı hücum baş verib. Hadisə səhər saatlarında, dərs prosesi zamanı akademiyanın ikinci tədris korpusunda qeydə alınıb.
Silahlı şəxs binaya daxil olaraq auditoriyalarda və dəhlizlərdə atəş açıb. Hücum qısa müddətdə panikaya səbəb olub. Nəticədə 12 nəfər həlak olub, 13 nəfər yaralanıb. Ölənlər arasında tələbələr və müəllimlər yer alıb. Hücum edən şəxs daha sonra özünü güllələyərək intihar edib.
Pakistanda təhsil müəssisələrinə yönəlmiş ən ağır terror aktı 16 dekabr 2014-cü ildə Peşəvər şəhərində yerləşən Army Public School and College məktəbində baş verib.
Həmin gün səhər saatlarında silahlı şəxslər məktəbə daxil olaraq sinif otaqlarında atəş açıb və partlayıcı qurğulardan istifadə ediblər. Hücum zamanı əsas hədəf şagirdlər və müəllimlər olub. Nəticədə 145 nəfər həlak olub, onların əksəriyyətini məktəbli uşaqlar təşkil edib. 150-dən çox insan isə müxtəlif dərəcəli xəsarətlər alıb. Hücum Taliban terror qruplaşması tərəfindən həyata keçirilib.
Rusiyada 2021-ci il sentyabrın 20-də Perm şəhərində yerləşən Perm Dövlət Universitetinin kampusunda faciəvi hadisə baş verib. Səhər saatlarında 18 yaşlı universitet tələbəsi silahla kampus ərazisində atəş açmağa başlayıb. Hücum zamanı tələbə və müəllimlər ciddi təhlükə ilə üzləşiblər; bəziləri otaqlarda barrikada quraraq gizlənib, digərləri isə pəncərələrdən tullanaraq xilas olmağa çalışıblar.
Hadisə nəticəsində 6 nəfər həlak olub, 40-dan çox insan müxtəlif dərəcəli xəsarətlər alıb. Rəsmi araşdırmalara əsasən, hücumun motivi şəxsi səbəblər və psixoloji problemlərlə izah edilib, siyasi və ya dini motiv təsdiqlənməyib. Hücumçu polis tərəfindən saxlanılıb və daha sonra xəstəxanaya yerləşdirilib.
