"Sürətlə dəyişən dünyada tələbələr öyrənmə təcrübələrini daha da təkmilləşdirməyin yollarını axtarırlar. Süni İntellektin (Aİ) sürətli inkişafı isə təhsil alətləri və resurslarını köklü şəkildə dəyişərək dərs oxuma və öyrənmə prosesini daha səmərəli və maraqlı edir".
AzEdu.az xəbər verir ki, bu fikirləri Azərbaycan Dövlət İqtisad Universitetinin rektoru, professor Ədalət Muradov rəsmi feysbuk hesabında qeyd edib.
Rektor bildirib ki, Aİ əsaslı təhsil alətləri tələbələrin öyrənmə vərdişlərini analiz edərək onların ehtiyaclarına uyğun fərdiləşdirilmiş resurslar təqdim edir:
"Artıq süni intellekt onlayn öyrənmə platformalarına, virtual repetitorluq xidmətlərinə və müxtəlif təhsil tətbiqlərinə inteqrasiya olunub. Bu texnologiyalar tələbələrə çətin mövzuları daha asan qavramağa, problem həll etmə bacarıqlarını inkişaf etdirməyə və yeni dillər öyrənməyə kömək edir. “Aİ tələbənin diqqətinin ən yüksək olduğu vaxtları müəyyənləşdirərək ən uyğun oxu saatlarını tövsiyə edə, güclü və zəif tərəfləri üzə çıxararaq dərs prosesini nəticələrə uyğunlaşdıra bilir”,- deyə Ə.Muradov vurğulayıb.
Onun sözlərinə görə, Aİ əsaslı oxu alətləri oxunan materiallara uyğun testlər və sınaq imtahanları hazırlayaraq biliklərin möhkəmlənməsinə və imtahanlardan əvvəl özünəinamın artmasına şərait yaradır:
"Eyni zamanda, 24/7 əlçatan olan virtual repetitorlar tələbələrin suallarını cavablandırır, ev tapşırıqlarını izah edir və mürəkkəb mövzularla bağlı nümunələr təqdim edir. Aİ tədqiqat layihələri üçün etibarlı mənbələrin tapılmasında və məlumatların toplanmasında da mühüm rol oynayır. Bu, tələbələrə vaxt itirmədən məlumatların təhlilinə və arqumentlərin qurulmasına fokuslanmağa imkan verir.
Bundan əlavə, disleksiyası olan tələbələr üçün mətni səsə çevirən Aİ alətləri təhsilin daha inklüziv olmasına töhfə verir. Aİ-nin təhsili köklü şəkildə dəyişdirmək potensialı böyükdür. “Lakin birmənalı qəbul edilməlidir və hətta qanunvericiliklə təsbit olunmalıdır ki, süni intellekt ənənəvi tədrisi əvəz etməməli, onu tamamlamalıdır".
Sonda Ə.Muradov vurğulayıb ki, hər kəs Aİ-nin imkanlarından düzgün istifadə etməklə akademik hədəflərinə çata bilər və bu gün daha “ağıllı” oxumağın açarı məhz süni intellektdədir.
