Nevroelm (Neuroscience) sahəsində aparılan son dərəcə maraqlı bir beynəlxalq tədqiqatda alimlər körpə beyninin formalaşmasının nə qədər erkən yaşda insan davranışlarına təsir etdiyini sübut edən yeni elmi nəticələr əldə ediblər. Araşdırma zamanı təxminən 3 aylıq körpələrin beynində yerləşən “ağ maddə” yollarının (white matter tracts) struktur mikrobirləşməsi- yəni neyron liflərinin sıxlığı, istiqamətliliyi və qarşılıqlı əlaqə gücü- yüksək dəqiqlikli NODDI (Neurite Orientation Dispersion and Density Imaging) adlı müasir MRT texnologiyası vasitəsilə öyrənilib.
AzEdu.az-ın araşdırmasına əsasən, bu texnika ənənəvi MRT-dən fərqli olaraq, beyin toxumasının mikroskopik səviyyədə təşkilini göstərməyə imkan verir və beləliklə alimlər körpə beynində sinir əlaqələrinin nə dərəcədə sıx və kompleks şəkildə qurulduğunu izləyə biliblər. Araşdırmada 95 körpə-valideyn cütü iştirak edib və məqsəd beyin strukturundakı erkən fərqliliklərin, gələcək aylarda körpələrin emosional reaksiyaları, özünü sakitləşdirmə qabiliyyəti və stressə uyğunlaşma səviyyəsi ilə necə əlaqəli olduğunu müəyyənləşdirmək olub.
Araşdırmanın nəticələri göstərib ki, körpə beyninin struktur xüsusiyyətləri artıq 3 aylıq yaşdan etibarən onun gələcək emosional davranışlarını formalaşdırmağa başlayır. Alimlərin fikrincə, bu tapıntılar körpə beynində emosional tənzimləməni təmin edən neyron şəbəkələrinin çox erkən yaşda formalaşmağa başladığını göstərir. Beləliklə, uşaq böyüdükcə bu ilkin sinir “arxitekturası” onun stressə reaksiyasını, ünsiyyət tərzini və sosial davranışlarını formalaşdırır.
