Zürih Universitetində aparılan yeni elmi araşdırma göstərir ki, beynin iki fərqli bölgəsinə elektrik stimullaşdırılması tətbiq etməklə insanların daha az eqoist davranmasına təsir göstərmək mümkündür.
AzEdu.az xarici KİV-ə istinadən xəbər verir ki, tədqiqat çərçivəsində 44 könüllüdən özləri ilə anonim bir iştirakçı arasında müəyyən məbləğdə pulu necə bölüşdürəcəklərinə qərar vermələri istənilib.
Təcrübə zamanı beynin ön (frontal) və arxa (parietal) hissələrinə zəif elektrik cərəyanı verilib. Hər iki bölgə eyni anda stimullaşdırıldıqda iştirakçıların daha çox pul paylaşdığı müşahidə edilib.
Araşdırmaya rəhbərlik edən professor Christian Ruff bildirib ki, təsir böyük olmasa da, statistik baxımdan əhəmiyyətlidir. Tədqiqat qrupunun üzvü Jie Hu isə qeyd edib ki, cərrahi müdaxilə tələb etməyən bu üsul insanların öz maraqları ilə başqalarının maraqları arasında balans qurmasına birbaşa təsir göstərə bilər.
Mütəxəssislər vurğulayırlar ki, müşahidə edilən təsirlər qısamüddətlidir. Professor Ruff bunu idmanla müqayisə edərək bildirib ki, tək bir tətbiq qalıcı dəyişiklik yaratmır, lakin müntəzəm təkrarlanan stimullaşdırma uzunmüddətli nəticələr verə bilər.
