İnsan bədəninin onlarla gizli ritmi var və bu ritmlər günün hər saatında hisslərimizin necə işlədiyini müəyyən edir. Bu bioloji ritmlərdən biri də qoxu alma qabiliyyətimizlə bağlıdır.
AzEdu.az-ın araşdırmasına görə, alimlər müəyyən ediblər ki, insan qoxuları ən yaxşı səhər saatlarında hiss edir. Günün bu vaxtı burnun qoxu reseptorları daha həssas olur, beyin qoxu siqnallarını daha sürətli qəbul edir və onların təhlilini daha dəqiq aparır.
Bu xüsusiyyət təsadüfi deyil təkamülün bizə miras qoyduğu bir xatirədir. Min illər əvvəl insanlar səhərlər ov üçün oyanır, təbiətdə hərəkət edən heyvanları tapmaq və təhlükələri hiss etmək üçün daha diqqətli olmalı idilər. Qoxu alma qabiliyyətinin səhər güclü olması ovçuluqda üstünlük yaradırdı: heyvan izlərinin qoxusunu tutmaq, suya və ya yeməyə daha tez çatmaq, yaxud yırtıcıdan vaxtında xəbərdar olmaq kimi. Bu, həm ovun uğuru, həm də insanın sağ qalması üçün mühüm rol oynayırdı.
Zaman keçdikcə həyat tərzimiz dəyişsə də, bədənimiz bu qədim mexanizmi qoruyub saxladı. Ona görə bu gün də səhər saatlarında ətrafdakı qoxular daha kəskin duyulur, müəyyən qoxular daha asan ayırd edilir. Beləliklə, qoxu duyğumuzun günün ilk saatlarında güclənməsi, insanın təkamül tarixindən qalan maraqlı bir reliktdir. Keçmişin səssiz izləri bu gün də hisslərimizin arxasında yaşayır.
