2024-2025-ci tədris ilində Muxtar Respublikanın ümumtəhsil müəssisələrini bitirən məzunlar Naxçıvanda fəaliyyət göstərən ali təhsil müəssisələri ilə yanaşı, ölkənin nüfuzlu universitetlərinə də qəbul olunublar. Tələbə adını qazanan 1861 məzundan 591-i pedaqoji profilli ixtisasları seçib. Onlardan 88 məzun 500-700 bal intervalında nəticə göstərib.
Bəs son 3 ilin statistikası necədir?
Mövzu ilə bağlı AzEdu.az Təhsil Portalı Naxçıvan Muxtar Respublikası Təhsil Nazirliyinə sorğu ünvanlayıb.
Nazirlikdən sorğumuza cavab olaraq bildirilib ki, 2022-2023-cü tədris ilində tələbə adını qazanan 1605 məzundan 422-si pedaqoji profilli ixtisasları seçib:
"Onlardan 23 məzun 500-700 bal intervalında nəticə göstərib. 2023-2024-cü tədris ilində tələbə adını qazanan 1756 məzundan 419-u pedaqoji profilli ixtisasları seçib. Onlardan 47 məzun 500-700 bal intervalında nəticə göstərib".
Statistikaya əsasən, son üç ildə Muxtar Respublikanın məzunları arasında pedaqoji ixtisaslara maraqda artım müşahidə olunur.
Xüsusilə 2024-2025-ci tədris ilində həm pedaqoji ixtisası seçən məzunların, həm də 500-700 bal intervalında nəticə göstərənlərin sayının əvvəlki illərlə müqayisədə əhəmiyyətli dərəcədə artması diqqəti cəlb edir. Bu da regionda müəllimlik peşəsinə marağın gücləndiyini göstərir.
