2024/2025-ci tədris ilində sağlamlıq imkanları məhdud uşaqlar üçün xüsusi təhsil müəssisələrinin ümumi sayı 17 olub. Bu müəssisələrdə ümumilikdə 5 434 nəfər şagird təhsil alıb.
AzEdu.az-ın əldə Dövlət Statistika Komitəsindən aldığı məlumata görə, xüsusi təhsil müəssisələrinin strukturuna nəzər saldıqda, onların 8-i xüsusi ümumtəhsil məktəbi olub. Bu məktəblərdə 3 273 nəfər şagird oxuyub. 9 internat tipli xüsusi ümumtəhsil məktəbində isə 2 161 nəfər şagird təhsil alıb.
Xəstəliyin növləri üzrə ixtisaslaşmış xüsusi təhsil müəssisələrində vəziyyət belə olub: Əqli (psixi) pozuntuları olan uşaqlar üçün fəaliyyət göstərən 8 müəssisədə 3 485 nəfər şagird təhsil alıb.Görmə pozulmaları olan uşaqlar üçün nəzərdə tutulmuş 2 müəssisədə 310 nəfər şagird qeydə alınıb.
Eşitmə pozulmaları olan uşaqlar üçün fəaliyyət göstərən 2 müəssisədə 699 nəfər şagird oxuyub.Dayaq-hərəkət aparatının funksiyalarının pozuntuları və skolioz xəstəliyi olan uşaqlar üçün olan 1 müəssisədə 103 nəfər şagird təhsil alıb.Nitq pozulmaları olan uşaqlar üçün nəzərdə tutulmuş 2 müəssisədə 508 nəfər şagird təhsil alıb.Digər kateqoriyalar (sair) üzrə fəaliyyət göstərən 2 müəssisədə isə 329 nəfər şagird oxuyub.
Bundan əlavə, ümumi təyinatlı və inteqrasiya təlimli təhsil müəssisələrində təşkil olunmuş siniflərdə 2024/2025-ci tədris ilində 1 346 nəfər sağlamlıq imkanları məhdud uşaq təhsil alıb.
