Son elmi tədqiqatlar göstərir ki, 3-4 yaşlı uşaqlar düşündüyümüzdən daha erkən yaşda ədalət anlayışını formalaşdırırlar.
AzEdu.az-ın əldə etdiyi məlumata görə, alimlər tərəfindən aparılan araşdırmalar nəticəsində bu yaş qrupundakı uşaqlar resursların (məsələn, oyuncaq, konfet və ya diqqət) qeyri-bərabər bölüşdürülməsini müşahidə etdikdə bunu ədalətsiz davranış kimi dəyərləndirə bilirlər.
Tədqiqatlar zamanı uşaqlara sadə səhnələr göstərilib: bir personajın hamıya bərabər pay verdiyi, digərinin isə yalnız bir uşağa üstünlük tanıdığı vəziyyətlər. Nəticələrə görə, uşaqlar ədalətsiz bölgü zamanı narahatlıq əlamətləri göstərib, üz ifadələri dəyişib və bəzən açıq şəkildə etiraz ediblər. Bəzi uşaqlar isə haqsızlıq edən personaja qarşı mənfi münasibət sərgiləyiblər.
Mütəxəssislər bildirir ki, bu reaksiyalar uşaqlarda empati hissinin və sosial ədalət anlayışının çox erkən yaşlardan inkişaf etməyə başladığını sübut edir. Alimlərin fikrincə, bu bacarıqlar uşağın ailə mühiti, valideyn davranışı və sosial münasibətlərindən də güclü şəkildə təsirlənir.
Uşaq psixoloqları valideynlərə tövsiyə edir ki, gündəlik həyatda ədalətli davranış nümayiş etdirsinlər, paylaşma və bərabərlik mövzularını izah etsinlər. Bu cür yanaşma uşaqların sağlam sosial və emosional inkişafına müsbət təsir göstərir.Araşdırmalar bir daha göstərir ki, uşaqlar yalnız öyrənən deyil, eyni zamanda ətraf dünyadakı sosial qaydaları müşahidə edən və qiymətləndirən fəal fərdlərdir.
