Uşaqlara ev tapşırığı vermək uzun illərdir ki, təhsil sistemlərinin müzakirə mövzusudur. Müxtəlif ölkələr bu məsələyə fərqli yanaşmalar sərgiləyir. Bəziləri ev tapşırığını vacib hesab edir, digərləri isə uşağın istirahət haqqı kimi məktəbdənkənar vaxtını qorumağa üstünlük verir. Bəs dünyada vəziyyət necədir?
AzEdu.az bununla bağlı araşdırma aparıb.
Ev tapşırığı az olan ölkələr
Finlandiya dünyada təhsilin keyfiyyətinə görə ön sırada gedən ölkədir. Burada ibtidai siniflərdə demək olar ki, heç bir ev tapşırığı verilmir. Orta məktəbdə isə tapşırıqların miqdarı çox azdır – orta hesabla gündə yarım saat. Bu sistem uşağın məktəbdən sonra dincəlməsinə, ailə ilə vaxt keçirməsinə və maraqlarını inkişaf etdirməsinə şərait yaradır.
Niderland və Estoniya kimi digər Avropa ölkələrində də ibtidai təhsil mərhələsində ev tapşırıqları ya verilmir, ya da olduqca yüngül olur. Bu ölkələrdə əsas məqsəd uşağın öyrəndiklərini dərsdə mənimsəməsi və əlavə təzyiq yaşamamasıdır.
Ev tapşırığının üstünlük təşkil etdiyi ölkələr
Əksinə, Çin, Cənubi Koreya və bəzi Asiya ölkələrində ev tapşırıqları hələ də təhsilin əsas hissəsi sayılır. Şagirdlər günün 2-3 saatını məktəbdənkənar təkrar və hazırlıq işlərinə sərf edirlər. Burada əsas hədəf yüksək nəticələr və universitet imtahanlarında uğur olsa da, bu sistem uşaqlarda stress və sosial təcrid halları ilə müşayiət olunur.
Türkiyə, Rusiya və digər post-sovet ölkələrində də ev tapşırıqları geniş yayılıb. Uşaqlar kiçik yaşlardan etibarən evdə təkrar etməyə öyrədilir və valideyn nəzarəti ilə gündəlik dərslər hazırlanır.
