Ali təhsil çağdaş cəmiyyətlərdə həm fərdi inkişafın, həm də iqtisadi və sosial rifahın əsas şərtlərindən biri kimi qəbul olunur. Bu baxımdan təhsilə çıxış imkanlarının genişlənməsi və ali təhsilli gənclərin sayının artması ölkənin gələcək potensialı üçün strateji əhəmiyyət daşıyır.
AzEdu.az xarici KİV-ə istinadən xəbər verir ki, OECD-nin (İqtisadi Əməkdaşlıq və İnkişaf Təşkilatı) “Education at a Glance 2025” adlı illik hesabatı, üzv ölkələr üzrə təhsil göstəricilərini müqayisəli şəkildə təqdim edərək bu sahədə qlobal və regional tendensiyaları ortaya qoyur. Hesabatda Almaniyanın göstəriciləri xüsusi diqqət çəkir.
OECD-nin 2025-ci il üçün açıqladığı məlumata əsasən, Almaniyada 25–34 yaş arası gənclər arasında ali təhsil və ya ona bərabər tutulan ixtisas səviyyəsi (məsələn, "master ustası" sertifikatı) olanların payı 2019-cu ildə 33% olduğu halda, bu göstərici 2024-cü ilə qədər 40%-ə yüksəlib. Bu artım Almaniyanın ali təhsilə çıxışı artırmaq və gəncləri yüksək ixtisaslı əmək bazarına hazırlamaq istiqamətində atdığı siyasətlərin effektivliyindən xəbər verir.
OECD-nin hesabatı göstərir ki, Almaniyada ali təhsilə çıxış imkanları genişlənməkdədir və gənclər arasında təhsil səviyyəsinin yüksəlməsi müşahidə olunur. 25–34 yaş qrupunda ali və yüksək peşə təhsilli şəxslərin artması ölkənin intellektual potensialını gücləndirsə də, digər tərəfdən, ixtisas almamış gənclərin payının artması təhsil sistemində struktur problemlərin hələ də mövcud olduğunu göstərir.
