2025-ci ilin payızında İsveç təhsil sistemi əhəmiyyətli bir islahata imza atmağa hazırlaşır. Bu dəyişiklik, xüsusilə əqli əlilliyi olan şagirdlərə yönəlik peşə təhsili sahəsində olacaq.
AzEdu.az xarici mediaya istinsdən xəbər verir ki, yeni proqramlar şagirdlərin praktik bacarıqlarını artırmaq və onların gələcəkdə əmək bazarında daha rahat yer tutmalarını təmin etmək məqsədini daşıyır. İsveç hökuməti və təhsil qurumları tərəfindən hazırlanan bu təşəbbüs, inklüziv və fürsət bərabərliyinə əsaslanan bir cəmiyyət yaratma yolunda mühüm addım kimi qiymətləndirilir.
Yeni proqramların əsas məqsədi, əqli əlilliyi olan tələbələrin yalnız nəzəri deyil, eyni zamanda gündəlik həyat və əmək fəaliyyəti ilə bağlı praktik bacarıqlara yiyələnməsini təmin etməkdir. Təhsil proqramı bir neçə əsas sahəni əhatə edəcək:
Təmizlik və gigiyena xidmətləri – ictimai və şəxsi məkanların gigiyenik qaydalara uyğun təmizlənməsi, təhlükəsizlik və sanitariya standartlarının öyrədilməsi;
Xidmət və qonaqpərvərlik – restoran, otel və digər xidmət sahələrində ünsiyyət, qonaq qarşılanması və müştəri məmnuniyyəti üzrə bacarıqlar;
Marketinq və satış – sadə satış əməliyyatları, kassadan istifadə, müştəri xidməti və məhsul təqdimatı;
Ümumi xidmət sahələri – bağçılıq, poçt xidməti, sadə logistika və digər gündəlik vəzifələrə uyğun praktik məşğələlər və s.
Proqramların tərkibi təkcə peşə bacarıqları ilə məhdudlaşmayacaq, həm də sosial inteqrasiyanı gücləndirəcək, özünəinamı artıracaq və müstəqil yaşam bacarıqlarını təşviq edəcək elementlərdən ibarət olacaq.
Yeni kurikulumlar həm məktəb daxilində, həm də iş yerlərində keçiriləcək təcrübə proqramları ilə dəstəklənəcək. Tələbələr real iş mühitində təcrübə qazanacaq və gələcəkdə tam və ya qismən məşğulluq imkanlarına sahib olacaqlar.
İsveçin 2025-ci ildən etibarən tətbiq edəcəyi bu yeni peşə təhsil proqramı, əqli əlilliyi olan tələbələrin cəmiyyətə və iş dünyasına daha effektiv inteqrasiyasına şərait yaradacaq. Bu, yalnız həmin tələbələrin deyil, bütövlükdə cəmiyyətin daha inklüziv və ədalətli bir şəkildə inkişafına xidmət edən bir islahat kimi dəyərləndirilir. Təhsil sistemində belə addımlar, İsveçin sosial rifah modelini gücləndirməklə yanaşı, əmək bazarında daha geniş iştirakçılığı təmin etmək məqsədini də daşıyır.
