Hər il olduğu kimi, bu il də yüzlərlə tələbə universitetlə vidalaşaraq məzun adını qazanıb. Onların arasında fərqlənmə diplomu ilə təhsilini başa vuranlar da var.
Bəs bu il neçə tələbə fərqlənmə diplomu ilə ali təhsilini tamamlayıb?
Mövzu ilə bağlı AzEdu.az Azərbaycan Dövlət Neft və Sənaye Universitetinə (ADNSU) sorğu ünvanlayıb.
Universitetdən verilən məlumata görə, ümumilikdə bakalavr, magistratura və təkrar ali təhsil pillələri üzrə 3534 nəfər məzun olub. Onlardan 194 nəfəri fərqlənmə diplomuna layiq görülüb.
Belə ki, 2024/2025-ci tədris ilində ADNSU-nun bakalavr pilləsini 2555 nəfər tələbə uğurla başa vurub. Onların 57 nəfəri fərqlənmə diplomu alıb.
Magistratura səviyyəsində isə ümumi məzun sayı 1187 nəfər təşkil edir. Onlardan 136 nəfəri təhsilini fərqlənmə ilə tamamlayıb. Bu isə magistratura pilləsində fərqlənmə göstəricisinin daha yüksək olduğunu göstərir.
Təkrar ali təhsil üzrə isə 161 nəfər məzun qeydiyyata alınıb. Onların yalnız 1 nəfəri təhsilini fərqlənmə ilə başa vurub.
