Koreya (Cənubi) Respublikasının İNHA Universitetinin əməkdaşı Hanuel Lee Bakı Mühəndislik Universitetində (BMU) keçirilən “Yay məktəbi”ndə “İnşaat mühəndisliyi” ixtisası üzrə “Hidrologiya” fənnini tədris edib. Yay tədris prosesi ilə bağlı fikirlərini bölüşən koreyalı müəllim bildirir ki, BMU və İNHA Universiteti arasında gerçəkləşdirilən beynəlxalq ikili diplom proqramı çərçivəsində görülən işlər gələcək üçün olduqca önəmlidir. Onun fikrincə, atılan addımlar BMU-da iqlim dəyişikliyinin mənfi təsirlərinə qarşı dayanıqlı şəhərlərin formalaşmasına töhfə verəcək tədqiqatçıların da yetişməsinə zəmin yaradacaq.
BMU-dan AzEdu.az-a bildirilib ki, tədris etdiyi fənn haqqında məlumat verən Hanuel Lee “Hidrologiya”nın yağıntı, evapotranspirasiya, itkilər və axın kimi prosesləri əhatə edən su dövranını öyrənən elm olduğunu vurğulayıb. Əlavə edib ki, son illərdə iqlim dəyişikliyi nəticəsində yağıntının dəyişkənliyi artmaqdadır. Bu isə öz növbəsində dünya miqyasında daşqınlar və quraqlıqlar kimi təbii fəlakətlərin intensivliyini və təsir dairəsini genişləndirir: “Belə şəraitdə hövzə daxilində yağıntı və su itkisi əsasında axın həcminin hesablanması su balansının qorunması baxımından mühüm əhəmiyyət kəsb edir. Hidrologiyanı öyrənərək suyu balanslaşdırıb, sel və quraqlıqdan gələn zərərləri azalda bilərik”.
Qeyd edək ki, BMU ilə İNHA arasında gerçəkləşdirilən ikili diplom proqramı çərçivəsində keçirilən və akademik ilin davamı olan yay tədris prosesi 3 həftəlik dövrü əhatə edir. Builki “Yay məktəbi”nə İNHA Universitetinin 15 nəfər professor-müəllim heyəti cəlb olunub.
