Bakı Mühəndislik Universitetinin (BMU) müəllim və tələbə heyətinin Çin Xalq Respublikasına səfəri başlayıb. Səfər BMU ilə dünyada öncül mövqeyə malik Pekin Kimya Texnologiyaları Universiteti (PKTU) arasında imzalanmış və Kimya, Kompüter, Mexanika mühəndisliyi ixtisasları üzrə bu ildən etibarən həyata keçiriləcək ikili diplom proqramını nəzərdə tutan müqavilə çərçivəsində təşkil edilib.
BMU-dan AzEdu.az-a bildirilib ki, müqavilə tələbələrə hər iki universitetdən diplom almaq imkanı yaratmaqla yanaşı, yay məktəbinin təşkili, tələbə-müəllim mübadiləsi kimi istiqamətlərdə əməkdaşlığı nəzərdə tutur. Səfər zamanı hər iki universitetin fəaliyyəti, tədris imkanları və beynəlxalq əlaqələri ilə bağlı təqdimatlar keçiriləcək, tələbələr üçün yay məktəbi təşkil ediləcək. Bununla yanaşı, elmi-tədris əlaqələrinin genişləndirilməsi istiqamətində fikir mübadiləsi aparılacaq. Bu səfər, həmçinin BMT-nin Dayanıqlı İnkişaf Məqsədlərindən olan “Keyfiyyətli təhsil” və “Məqsədlər üçün tərəfdaşlıq” istiqamətlərinə töhfə verir.
Beynəlxalq təhsil əlaqələrinin genişləndirilməsi, müəllim və tələbələrin qlobal təcrübə qazanması, yeni tədris, tədqiqat metodlarının öyrənilməsi, eyni zamanda, BMU ilə Çin ali təhsil müəssisələri arasında əməkdaşlıq təşəbbüsləri qlobal tərəfdaşlıqların gücləndirilməsi baxımından əhəmiyyətlidir.
