Azərbaycan Memarlıq və İnşaat Universitetinin (AzMİU) Mühit dizaynı kafedrasının təşəbbüsü ilə İtaliya – Azərbaycan Dizayn Mərkəzində ilk dəfə “Virtual Sərgi (Digital Art)” keçirilib.
Universitetdən AzEdu.az-a bildirilib ki, sərginin məqsədi tələbələrin kreativ potensialını, dizaynla bağlı nəzəri və praktiki biliklərini bir araya gətirərək yeni nəsil dizaynerlərin yaradıcı təfəkkürünü önə çıxarmaq olub.
Sərginin açılış mərasimində Dizayn fakültəsinin dekan müavini Kəmalə Yusifova, Mühit dizaynı kafedrasının müdiri professor Yeganə Hacıyeva, tanınmış memar Cəmil Axundov, Təsviri incəsənət kafedrasının müdiri Pərviz Cəfərov, həmçinin kafedraların əməkdaşları və tələbələr iştirak ediblər.
Mühit dizaynı kafedrasının dosenti Nərgiz Ağayeva virtual sərgini açıq elan edərək memarlıq və dizayn sənətinin çoxşaxəli yaradıcı imkanlarından danışıb, bu sərginin yaranması və ideyasını auditoriyaya çatdırıb. Memarlıq və dizayn sənətində rəqəmsal texnologiyaların artan roluna diqqət çəkib.
Dizayn fakültəsinin 3 və 4-cü kurs tələbələri arasında qeyri-adi rəsm çəkmə və təsviri ifadə vasitələri imkanlarına malik 7 istedadlı tələbənin iştirakı ilə gerçəkləşən sərgi maraqlı məqamlarla yadda qaldı və müasir dizayn təfəkkürünün müxtəlif yönlərini nümayiş etdirib.
Sərginin sonunda Mühit dizaynı kafedrasının müdiri Yeganə Hacıyeva, Təsviri incəsənət kafedrasının müdiri Pərviz Cəfərov və Mühit dizaynı kafedrasının baş müəllimləri Təranə Əbdülrəhimova və Aytən Şərifova sərgini yüksək qiymətləndirdilər və gənclərə gələcək fəaliyyətlərində uğurlar arzulayıblar.
Tədbirin yekununda sərgi iştirakçıları fakültə və Mühit dizaynı kafedrası tərəfindən təşəkkürnamələrlə təltif olunublar.
Təltif olunan iştirakçılar:
• Məlahət Mehtdiyeva (161a2)
• Günay Hüseynova (161a2)
• Sevil Kərimli (162a4)
• Leyla Mürsəlova (162a1)
• Fidan Novruzova (162a4)
• Ləman Mirzəyeva (162a1)
• Simuzər Abbasova (162a2)
