Ali təhsil müəssisələrində müxtəlif yaş qrupuna məxsus şəxslərin təhsil almasında heç bir əngəl yoxdur. Belə ki, yaşı böyük olan insanlarda tələbə adını qazana bilirlər.
Onlar içərisindən yaşı yüksək olan tələbələr də yer alır.
Mövzu ilə bağlı AzEdu.az Təhsil Portalı olaraq universitetlərə sorğu ünvanladıq.
Sorğumuza cavab olaraq Azərbaycan Dövlət Pedaqoji Universitetinin (ADPU) İctimaiyyətlə əlaqələr və marketinq şöbəsinin müdiri Taleh Mirzəyev qeyd edib ki, universitetdə müxtəlif yaş qruplarından olan tələbələr təhsil alır:
“Onların arasında ən yaşlı tələbənin 56 yaşı var. O, Fiziki tərbiyə və çağırışaqədərki hazırlıq müəllimliyi ixtisası üzrə bakalavriat səviyyəsinin tələbəsidir. 51 yaşlı digər tələbə universitetin Pedaqogika ixtisaslaşması üzrə magistatura səviyyəsində təhsil alır.
Bu kateqoriyadan olan digər tələbələrə misal olaraq Korreksiyaedici təlim ixtisası üzrə bakalavr səviyyəsində təhsil alan 50 yaşlı, Biznesin idarə edilməsi ixtisaslaşmasının magistrantı 47 yaşlı, Kimya müəllimliyi ixtisasının 47 yaşlı tələbəsi və Coğrafiya müəllimliyi ixtisasının 46 yaşlı tələbəsi göstərmək olar”.
Azərbaycan Dövlət İqtisad Universitetindən (UNEC) İctimaiyyətlə əlaqələr şöbəsinin müdiri Elnarə Məmmədova bildirilib ki, Azərbaycan Dövlət İqtisad Universitetində( UNEC) ümumilikdə 175 nəfər yaşlı tələbə təhsil alır:
“Magistratura səviyəsi üzrə həmin tələbələrin sayı 28 nəfərdir. 118 nəfər isə bakalavriatura üzrə qiyabi təhsil alır. UNEC-in Zaqatala filialında yaşlı tələbələrin sayı 26 nəfər nəfərdir.
Azərbaycan Turizm və Menecment Universitetindən (ATMU) qeyd edilib ki, universitetdə təhsil alan tələbələr içərisindən yaşı böyük olan 2 tələbə var:
“Belə ki, bakalavritura səviyyəsi üzrə 36 yaşlı Nəbiyev Salman İbrahim oğlu Turizm işinin təşkili ixtisası, magistratura səviyyəsi üzrə 50 yaşlı Hüseynov Səyyar Hümbət oğlu isə Maliyyə nəzarəti və audit ixtisaslaşmasında təhsilini davam etdirir”.
Bakı Slavyan Universitetinin (BSU) KİV-lə əlaqələr şöbəsindən verilən məlumata əsasən 47 yaşlı bir tələbə təhsil alır:
“Sadıxova Arifə Ənvər qızı İngilis dilinin tədrisi metodikası və metodologiyası ixtisaslaşması üzrə təhsilini davam etdirir”.
Lənkəran Dövlət Universitetinin (LDU) İctimaiyyətlə əlaqələr və mətbuat xidmətinin rəhbəri Esmira İsmayılova bildirib ki, 40 yaşdan yuxarı bakalavriat və magistratura pilləsi üzrə 23 tələbə təhsil alır:
“Ən yaşlı tələbəmizin 52 yaşı var. Bakalavriat səviyyəsi üzrə əyani təhsilalma forması üzrə 4-cü tədris ili tələbəsidir”.
Azərbaycan Texnologaiya Universitetindən məlumat verilib ki, yaşı 40-dan yuxarı olan bakalavriat üzrə 43 tələbə (4 tələbə əyani, 39 tələbə qiyabi), magistratura üzrə isə 4 tələbə təhsil alır;
“Bakalavriat səviyyəsində təhsil alanların ən yuxarı yaş həddi 52-dir. Bu təhsil pilləsində 1973-cü il təvəllüdlü 2 tələbə təhsil alır ki, onlar da təkrar ali təhsilə qəbul olanlardır. Magistratura səviyyəsində isə ən yuxarı yaş həddi olan tələbə 1979-cu il təvəllüdlüdür”.
Azərbaycan Texniki Universitetinin (AzTU) Mətbuat xidmətinin rəhbəri Sevinc İsgəndərova vurğulayıb ki, 51 və 54 yaşında iki tələbə təhsil alır:
"Belə ki, bakalavrda 54 yaşı olan Adilə İsmayılova İnformasiya texnologiyaları ixtisası üzrə, magistratura üzrə isə 51 yaşı olan Nərgiz Məmmədova Cihazqayırma mühəndisliyi ixtisası üzrə təhsil alır”.
