“Artıq dünyanın müxtəlif ölkələrində ali məktəblərdə təhsil almağa vaxt itkisi kimi baxırlar”
Bu sözləri AzEdu.az-a açıqlamasında təhsilin idarə olunması üzrə mütəxəssis Qoşqar Məhərrəmov bildirib.
Onun sözlərinə görə universitetlər hazırda akademik dünyada dəyərini itirir:
“Qeyd etmək lazımdır ki, xarici universitetlərlə paralel, Azərbaycan universitetləri də inkişaf edir. Sadəcə Azərbaycan universitetlərinin inşikafı müəyyən qədər zəif gedir.
Müşahidələrim əsasında deyə bilərəm ki, hazırda Azərbaycan universitetlərinin bir qismi sürətlə inkişaf edirlər. Bunlara Sumqayıt Dövlət Universiteti, Azərbaycan Dövlət İqtisad Universiteti, ADA, Xəzər Universiteti və s. aiddir. Ancaq digər universitetlərimiz bu kriteriyalardan uzaqdır. Hətta onu qeyd edim ki, bəzi universitetlərimiz reytinqlərdə olmaq üçün müraciət belə etmirlər, nəinki yer tutmağa nail olsunlar.
Dünyada müəyyən universitetləri yoxlayan akkreditasiya şirkətləri var. Sözügedən şirkətlərin tələblərinə cavab vermək üçün onlara müraciət etmək lazımdır. Onlar isə yoxlayır və əksik olan kriteriyaları deyirlər. Universitet bu kriteriyalar üzərində işləyir, ali məktəbi beynəlxalq akkreditasiyadan və ya yerli akkreditasiyadan keçirmiş olur. Qeyd olunan standartlara cavab verilərsə, onsuz da həmin ali məktəbdə təhsil keyfiyyəti artır”.
Həmsöhbətimiz qeyd edib ki, xaricdə təhsil almaq təkcə tədrisin keyfiyyətinə görə deyil, başqa cəhətlərdən də gənclər üçün faydalıdır:
“Gənclərimiz xaricdə təhsil aldıqları zaman yeni məlumatlar əldə edib, dünyagörüşlərini artırırlar, eyni zamanda dil biliklərini də inkişaf etdirirlər.
Bundan əlavə sadəcə akademik məsələ deyil, universitetin sosial-mədəni həyatı ümumi reytinq və keyfiyyətə təsir edir.
Eyni zamanda universitetin verdiyi təhsil əmək bazarının ehtiyacına yönəlik olması çox önəmlidir. Dünyanın bir çox universitetləri bu səriştələri qazandıra bilmədiyi üçün insanların çoxu universiteti yarıda qoyurlar”.
Q.Məhərrəmov qeyd edib ki, müəllimlərin peşəkar inkişafını təmin etməli, məvaciblər yaxşı olmalıdır ki, həmin univeristetlərdə daha bacarıqlı müəllimlər işləmək üçün can atsın:
“Həmçinin, ali məktəblər özünü yeniləyə bilməyən müəllimləri kənarlaşdırmalıdır. Digər müəllimlər isə səriştələrini artırmalıdır. Belə olduqda universitetlərimiz beynəlxalq reytinqdə nüfuzlu yerlərə sahib ola biləcəklər”.
