İyunun 28-də UNEC-də çox maraqlı proqramla müşahidə olunan “Məzun Günü” keçirilib.
AzEdu.az xəbər verir ki, “İnter Arena” stadionunda təşkil olunan tədbirdə universitetin rəhbərliyi, professor-müəllim heyəti, məzunlar və valideynlərlə yanaşı, dövlət rəsmiləri, millət vəkilləri, xarici qonaqlar, ictimaiyyət nümayəndələri və UNEC-in fəxri məzunları da iştirak ediblər.
Tədbirdə iştirak etmək üçün Fransanın Montpellier Universitetinin rəsmiləri də Azərbaycana təşrif buyurublar. Onlar UNEC-in Fransanın Montpellier Universiteti ilə ikili diplom proqramının ilk məzunlarını təbrik ediblər.
“Məzun Günü”nün aparıcısı Azərbaycanın xalq artisti Murad Dadaşov olub. Aparıcının giriş nitqindən sonra UNEC-in rektoru, professor Ədalət Muradov çıxış edərək, qonaqları salamlayıb, məzunları təbrik edib.
Qeyd edək ki, bu il universiteti ümumilikdə, 3468 məzun bitirib. Onların 2770-I bakalavr, 698-i isə magistr pilləsi üzrə təhsillərini başa vurublar. 226 məzun isə UNEC-lə fərqlənmə diplomu ilə vidalaşıblar.
Rəsmilər və fakültə nümayəndələrinin çıxışından sonra, məzunların mükafatlandırılması baş tutub. Hər fakültə üzrə təhsil uğurlarına görə seçilən tələbələr xüsusi mükafata layiq görülüblər.
Tədbirdə tələbələri məzun olmaları münasibətilə əməkdar artist Röya Ayxan da təbrik edib. Eyni zamanda populyar ifaçı Rauf (-40) və DJ Chına öz “remix”ləri ilə açıq havada keçirilən “Məzun Günü”nə rəng qatıblar.
