2025-ci ilin ilk yarısında Hindistanlı tələbələrin xaricdə təhsil üçün ayırdığı vəsaitlər son 7 ilin ən aşağı səviyyəsinə düşüb. Mütəxəssislər bu azalma fonunda iki əsas səbəbi önə çəkir: ABŞ və Kanadadakı sərt viza siyasətləri və Hindistan rupisinin digər valyutalara nisbətdə zəifləməsi.
AzEdu.az xarici mənbədən aldığı məlumata əsasən xəbər verir ki, Hindistan Mərkəzi Bankının məlumatına görə, yanvar-iyun 2025 dövründə xaricdə təhsil üçün göndərilən vəsaitlər 1,16 milyard ABŞ dolları təşkil edib ki, bu da ötən ilin eyni dövrü ilə müqayisədə 22% azalma deməkdir. Xüsusilə, iyun ayında bu rəqəm 138,8 milyon dollara düşərək son 5 ilin ən aşağı göstəricisi olub.
ABŞ-də F‑1 tələbə vizalarının müddətinin 4 illə məhdudlaşdırılması və əlavə 250 dollarlıq “viza etibarlılığı haqqı” tətbiqi, Hindistanlı tələbələrin ABŞ-yə marağını azaldıb. Bu səbəbdən universitetlərdə beynəlxalq tələbə sayı və onlardan əldə olunan təhsil haqqı gəliri də azalmağa başlayıb. Eyni zamanda, Hindistan rupisinin zəifləməsi xaricdə təhsil xərclərini artırıb və ailələrin büdcəsinə əlavə yük gətirib.
Təhsil ekspertləri bildirir ki, bu dəyişikliklər nəticəsində Hindistanlı tələbələr daha əlverişli viza və iş imkanları təklif edən ölkələrə yönəlməyə başlayıblar. Belə ölkələr arasında Almaniya, Fransa, İrlandiya və Yeni Zelandiya xüsusilə cəlbedici hesab olunur.
