2025/2026-cı tədris ili üzrə Dövlət Proqramı çərçivəsində xaricdə təhsil alacaq şəxslərdən biri də İbrahim Əmirovdur.
İbrahim Əmirov Tor Vergata Universitetində magistratura pilləsi üzrə təhsil alacaq.
AzEdu.az İ.Əmirov ilə həmsöhbət olub.
“ADNSU-da mexatronika mühəndisliyi ixtisasını bitirmişəm və eyni sahə üzrə İtaliyada da qəbul olmuşam. Xəbəri aldığım zaman yanımda demək olar ki, bütün ailəm var idi və onlar da bu sevinci mənim qədər yaşadılar. Daha əvvəl Rusiyada olmuşam, amma orada qalma müddətim qısa idi. Xaricdə uzun müddət qalmaq mənim üçün problem olmayacaq, çünki mənimlə birlikdə gedənlər və orada digər universitetlərə qəbul olmuş tanışlarım da var.
Bəzən insanlar magistraturaya oxumağı vaxt itkisi kimi qiymətləndirir. Amma mən belə düşünmürəm. Məsələn, mənim sahəm üzrə daha dərin biliklər tələb olunur. Azərbaycan Dövlət Neft və Sənaye Universitetində mexatronika təhsili almışam, indi isə bunu süni intellekt sahəsində tətbiq edərək öyrənə biləcəyəm ki, bu da mənim üçün çox faydalı olacaq.
Dövlət proqramını seçməyimin səbəbi isə hərtərəfli dəstəyidir: viza prosesi asanlaşır və maliyyə baxımından da əlverişlidir. HTP, Hangarium və Dövlət Proqramı arasında seçim etdim və nəticədə Dövlət Proqramını seçdim”.
