2025/2026-cı tədris ili üzrə Dövlət Proqramı çərçivəsində xaricdə təhsil alacaq şəxslərdən biri də Xədicə Axundovadır.
Xədicə Axundova Cons Hopkins Universitetinin magistratura pilləsində təhsil alacaq.
AzEdu.az X.Axundova ilə həmsöhbət olub.
"Qəbul xəbərini aldığım an ilk olaraq ailəmlə bölüşdüm. Çünki həmin vaxt yanımda məhz onlar var idi. Sonra müəllimlərimlə paylaşdım. Onlar mənə çox kömək etmişdilər.
Əslində, qəbul olacağıma inamım böyük idi. Bundan əvvəl də qəbul alanları görmüşdüm və bunun mümkünsüz olmadığını düşünməyə başlamışdım. Sadəcə, içimdə bir tərəddüd var idi ki, birdən alınmasa necə olar. Lakin xəbəri alanda bütün bu fikirlər uçub getdi.
Daha əvvəl də xaricə çıxmışam. Amma uzun müddət qalmamışam. “SABAH qrupları” ilə Avropa ölkələrinə səfərlərimiz olmuşdu. O vaxt qrup yoldaşlarımız və dekanımızla birgə iştirak etmişdik.
İndi isə uzun müddət ailəmdən kənarda qalmalı olacağam. Əlbəttə, müəyyən çətinliklər olacaq. Amma düşünürəm ki, adaptasiya prosesi çox da uzun çəkməyəcək və tez öyrəşəcəyəm. Bu zaman ərzində ən çox ailəm və dostlarım üçün darıxacağam.
Dövlət proqramına müraciət etməyimdə əsas səbəb isə budur ki, bu proqram dünyanın top universitetlərinə üstünlük verir. Mən də düşündüm ki, əgər belə bir universitetdən qəbul almışamsa, niyə müraciət etməyim?".
