Sentyabrın 12-də Bakı Mühəndislik Universitetində (BMU) növbəti GRE (Graduate Record Examinations) imtahanı təşkil olunub.
Bu barədə BMU-da AzEdu.az-a məlumat verilib.
Bildirilib ki, GRE imtahanı dünyanın ən böyük qiymətləndirmə proqramlarından biridir və bir çox xarici ali təhsil müəssisələrində magistr, MBA, doktorantura təhsili almaq üçün tələb edilir. Təqaüdlərin verilməsi zamanı da diqqət yetirilən göstəricilərdən biri olan GRE beynəlxalq imtahanı Təhsilin Qiymətləndirilməsi Xidməti (ETS - Educational Testing Service) tərəfindən idarə edilir və 160-dan çox ölkədə keçirilir.
İmtahanın nəticələri 2 həftəyə elan olunur və ETS-in saytında yerləşdirilir. GRE sertifikatı 5 il ərzində etibarlıdır.
Vurğulamaq vacibdir ki, xarici ölkələrdə təhsil almaq üçün tələb edilən dil və bacarıqları qiymətləndirən beynəlxalq imtahanların təşkilində uğurlu təcrübəyə malik olan BMU-da GRE ilə yanaşı, TOEFL iBT və SAT imtahanları da təşkil olunur.
Qarşıdakı dövr ərzində keçirilməsi nəzərdə tutulan imtahanlarla bağlı məlumat almaq üçün [email protected] və ya [email protected] email adreslərinə müraciət edə bilərsiniz.
