"Bu gün bir çox ali təhsil müəssisələrimizdə müxtəlif ixtisasların tədrisi həyata keçirilir. Mənim fikrimcə, bu, yolverilməzdir. Çünki bir çox universitetlər tədris etdikləri ixtisasları beynəlxalq standartlara uyğun şəkildə keçmir".
Bu sözləri AzEdu.az-a açıqlamasında təhsil eksperti Ramin Nurəliyev söyləyib.
Onun sözlərinə görə, hər hansı bir universitetin ixtisası layiqincə tədris etmə qabiliyyəti yoxdursa, həmin ixtisas ona verilməməlidir:
“Xüsusilə də bir çox özəl ali təhsil müəssisələrində vəziyyət çox dəhşətlidir. Baxırsan ki, universitetdə mühəndislik ixtisasları var, amma həmin universitetin bu sahəni tədris etməsi üçün kifayət qədər maddi-texniki bazası mövcud deyil, laboratoriyaları yoxdur. Kor-koranə ixtisas tədris edilir və nəticədə kor məzun yetişdirilir. Sabah həmin məzunlar əmək bazarında iş tapa bilmir.
Universitetlərə hər istədiyi ixtisası açmağa icazə verməməliyik. Əgər bir universitet maşın mühəndisliyi ixtisası açmaq istəyirsə, onun lazımi laboratoriyaları, maddi-texniki bazası olmalıdır. Hətta kiçik bir zavod formatında praktiki tədris sinfi də tələb edilməlidir. Əgər universitet bu ixtisası yüksək səviyyədə tədris edə bilmirsə, ona bu ixtisasın verilməsi qətiyyən yolverilməzdir".
Müsahibimiz qeyd edib ki, bu gün bir çox ali təhsil müəssisələrinin məzunları birbaşa əmək bazarında öz mövqelərini tuta bilmirlər:
“Bunun əsas səbəbi ali təhsil müəssisələrinin kadr hazırlığında qeyri-peşəkar yanaşmasıdır. Əgər müəllimlik ixtisası üzrə universiteti bitirən bir gənc MİQ imtahanına hazırlaşmaq üçün əlavə müəllim hazırlığı və ya kurs axtarırsa, pedaqoji ixtisasları tədris edən ali təhsil müəssisələri bu vəziyyətdən nəticə çıxarmalıdır.
Bəzi ixtisaslar üzrə müəyyən fənlər tədrisdən çıxarılmalıdır. Düşünürəm ki, ali təhsil müəssisələrinin kadr hazırlığı istiqamətində ciddi yoxlama mexanizmi formalaşdırılmalıdır. Universitetlər illərlə rahat şəkildə fəaliyyət göstərməyə öyrəşib. Ancaq əgər bir universitet tədris etdiyi ixtisası layiqincə öyrədə bilmirsə, həmin ixtisas ona verilməməlidir".
Təhsil eksperti hüquq fakültəsini bitirən bəzi məzunların hətta iddia ərizəsi yaza bilməməsini ciddi problem kimi qiymətləndirib:
“Bəzi universitetlərdə 400-500 ballıq ixtisaslara 200-250 balla qəbul mümkündür. Bu, həqiqətən də, acınacaqlı vəziyyətdir. Keçid balı aşağı olan universitetlər bu məsələnin üzərində ciddi düşünməlidir.
Burada iki ehtimal var: ya həmin universitetlərdə bu ixtisaslar kifayət qədər qənaətbəxş tədris edilmir, ya da ixtisasa uyğun keyfiyyətli kadr hazırlığı yoxdur".
