Təhsil sahəsi elə bir sahədir ki, həyata keçirilən islahatların nəticələri özünü qısa müddətdə deyil, uzun illərin sonunda göstərir. Son on ildə Azərbaycan təhsilində həm struktur, həm də məzmun baxımından mühüm dəyişikliklər baş verib.
İdarəetmənin çevikliyini artırmaq məqsədilə yaradılan Regional Təhsil İdarələri məktəblərlə təhsil orqanları arasındakı əlaqəni gücləndirib və problemlərin yerində, daha operativ şəkildə həllinə imkan yaradıb, eyni zamanda müəllimlərin sertifikasiyası, rəqəmsal transformasiya, kurikulum islahatları, beynəlxalq inteqrasiyanın gücləndirilməsi, xaricdə təhsil imkanlarının genişləndirilməsi və müəllimlər üçün qrant proqramları bu dövrün əsas istiqamətləri olub.
Bu fikirləri ETN yanında İctimai Şuranın sədr müavini, “FemACT” MMC-nin təsisçisi Pərvanə Məmmədova AzEdu.az-a açıqlamasında bildirib.
İdarəetmədə dəyişikliklər
"İlk növbədə idarəetmə sahəsində dəyişikliklər diqqət çəkir. Təhsildə Keyfiyyət Təminatı Agentliyi, Məktəbəqədər və Ümumi Təhsil üzrə Dövlət Agentliyi (MÜTDA), eləcə də ali və peşə təhsili üzrə müxtəlif fond və qurumların yaradılması sistemin daha çevik və hesabatlı olmasına xidmət edir. Müəllimlərin diaqnostik qiymətləndirilməsi və sertifikasiyası onların bilik və bacarıqlarının artırılmasına yönəlsə də, bu proses bəziləri üçün hələ də çətin və vaxt aparıcı olaraq qalır".
Müəllimlərin inkişafı
"Son illərin əsas istiqamətlərindən biri müəllimlərin inkişafıdır. Onlara təqdim olunan daxili və beynəlxalq qrant proqramları yeni tədris layihələrinin reallaşdırılmasına imkan yaradır. İxtisasartırma kursları və beynəlxalq təlimlər müəllimlərin peşəkar səviyyəsini yüksəltməyə xidmət etsə də, yeni kurikulumların tətbiqində bütün müəllimlərin hazırlıq səviyyəsi eyni deyil və bu da keyfiyyət fərqlərinə gətirib çıxarır".
Ali təhsildə transformasiya
"Ali təhsil də ciddi transformasiya mərhələsi yaşayıb. Boloniya prosesi çərçivəsində kredit sistemi tətbiq olunub, ikili diplom proqramları genişlənib, xarici universitet filialları açılıb. “Xaricdə Təhsil Dövlət Proqramı” sayəsində yüzlərlə gənc dünyanın nüfuzlu ali məktəblərində oxumaq imkanı qazanıb. Bununla belə, universitetlərin bir hissəsi əmək bazarının tələblərinə tam uyğun gəlmir və praktik biliklərin verilməsində çatışmazlıqlar qalmaqdadır. Ali və peşə təhsili üzrə beynəlxalq akkreditasiyaların sayı isə hələ də məhdud olaraq qalır".
Təhsilin rəqəmsallaşması
"Təhsilin rəqəmsallaşması isə başqa bir önəmli istiqamətdir. Virtual məktəb platforması, elektron dərsliklər və pandemiya dövründə məsafədən təhsil təcrübəsi rəqəmsal transformasiyanın əsas təcrübələri olub. Amma burada da problemlər qalır: şəhər və kənd məktəblərində rəqəmsal infrastruktur eyni səviyyədə təmin olunmayıb, bu da şagirdlərin imkanlarında fərqlər yaradır. Təhsil imkanlarında sosial-iqtisadi fərqlər də öz aktuallığını qoruyur".
Uğurlar və çağırışlar
"Ümumilikdə son on ildə Azərbaycan təhsilində mühüm irəliləyişlər müşahidə olunur. Müəllimlərin inkişafına və beynəlxalq inteqrasiyaya daha çox resurs ayrılması, idarəetmədə şəffaflığın güclənməsi, şagird yönümlü kurikulumların tətbiqi müsbət nəticələr verib. Lakin problemlər də az deyil: regionlarda tətbiq olunan layihələrin sürəti və effektivliyi müxtəlifdir, müəllimlərin hazırlıq səviyyəsində fərqlər qalır, universitetlərin bir qismi isə hələ də müasir əmək bazarının tələblərinə cavab verməkdə çətinlik çəkir.
Azərbaycan təhsili son onillikdə nəzərəçarpacaq qədər dəyişib. İndi əsas vəzifə bu uğurların üzərində dayanmadan, mövcud boşluqları doldurmaq və təhsil sistemini daha bərabər, müasir və effektiv etməkdir".
