Ümumi təhsil müəssisələrinin IX–XI sinif şagirdləri arasında keçirilən Ümummilli Lider Heydər Əliyevin 102-ci ildönümünə həsr olunmuş “Ən Yaxşı Təqdimat” müsabiqəsinin mükafatlandırılma mərasimi keçirilib .
AzEdu.az xəbər verir ki, müsabiqə Elm və Təhsil Nazirliyi , Heydər Əliyev Fondunun, Yeni Azərbaycan Partiyasının, Azərbaycan Təhsil İşçiləri Azad Həmkarlar İttifaqı Respublika Komitəsinin birgə təşkilatçılığı ilə təşkil olunub.
Tədbir Dövlət Himninin səsləndirilməsi ilə başlayıb. Ardınca müsabiqəyə həsr olunmuş videoçarx nümayiş olunub.
Mərasimdə Azərbaycan Respublikası Milli Məclisinin sədrinin birinci müavini, Yeni Azərbaycan Partiyası sədrinin müavini Əli Əhmədov, elm və təhsil naziri Emin Əmrullayev, YAP sədrinin müavini, Mərkəzi Aparatın rəhbəri, Dövlət Statistika Komitəsinin sədri Tahir Budaqov çıxış ediblər.
Ə.Əhmədov vurğulayıb ki, 2007-ci ilədən bəri keçirilən “Ən yaxşı təqdimat” müsabiqəsi kifayət qədər uğurlu olub: “ Hər bir xalq onun dövlətinin qurucusunu hörmətlə xatırlayır. Hesab edirəm ki Heydər Əliyevə də kök salmış hörmət var. H.Əliyev yeniyetmə nəsilə də xüsusi qayğı ilə yanaşırdı. O bilirdi ki, dövlətin gələcəyi gəncliklə bağlıdır. Onun yetişməkdə olan gəncliyə vətənpərvər kimi yetişmək və yeni biliklərə yiyələnməklə bağlı tövsiyyələri vardı”.
Daha sonra elm və təhsil naziri Emin Əmrullayev tədbirin önəmindən və azad olunmuş ərazilərdəki təhsil müəsissələrinin fəaliyyətindən danışıb.
Mərasimdə müxtəlif musiqi və rəqs nömrələri də təqdim olunub. İncəsənət Gimnaziyasının və Uşaq-Gənclər İnkişaf Mərkəzlərinin şagirdlərinin ifasında musiqi nömrələri səsləndirilib, rəqslər nümayiş etdirilib.
Sonda qaliblərin mükafatlandırılması mərasimi keçirilib. Səhnəyə dəvət olunan 35 qalibə diplomlar və hədiyyələr təqdim olunub, sonda xatirə şəkli çəkdirilib.
Qeyd edək ki, ümumi təhsil müəssisələrinin IX-XI sinif şagirdləri arasında keçirilən müsabiqəyə ölkəmizin regionlarından ümumilikdən 3952 şagird qatılıb. 95 nəfər şagird ölkə mərhələsində iştirak hüququ qazanıb. Onların təqdimat çıxışları müsabiqə komissiyası tərəfindən qiymətləndirilib və nəticədə 6 nəfər I, 13 nəfər II, 16 nəfər isə III yerə layiq görülüb.
