Kolleclərin tədris planları mütəmadi olaraq əmək bazarının dəyişən tələblərinə uyğun yenilənməlidir.
AzEdu.az-a bu sözləri Təhsil İşçilərinin Həmrəyliyi Alyansının (TİHA) sədri, təhsil eksperti Əmrah Həsənli söyləyib.
Müsahibimiz qeyd edib ki, gənclər ixtisası sadəcə qəbul olunmaq üçün deyil, gələcək peşə kimliyini qurmaq üçün seçməlidirlər:
"Əslində, bu problemin kökündə ixtisas seçimi zamanı peşə yönümünün zəif olması və kolleclərin əmək bazarı ilə əlaqələrinin yetərincə qurulmaması dayanır. Əgər tələbə hansı bacarığı inkişaf etdirdiyini və bu bacarığın gələcəkdə hansı iş imkanlarını açacağını bilmirsə, həmin təhsil prosesi məqsədyönlü nəticə vermir.
İlk növbədə, kolleclərin tədris planları mütəmadi olaraq əmək bazarının dəyişən tələblərinə uyğun yenilənməlidir. Bizim iqtisadiyyat dinamik şəkildə transformasiya olunur texnologiya, xidmət və sənaye sahələrində yeni peşələr yaranır. Buna görə də, kolleclərdə ənənəvi ixtisaslarla yanaşı, praktiki və əmək bazarına inteqrasiya olunan modullar, qısamüddətli sertifikatlaşdırma proqramları tətbiq olunmalıdır".
Kolleclərin missiyası yalnız “diplom verən” deyil, “peşə yetişdirən” təhsil müəssisəsinə çevrilməlidir:
"İkinci vacib istiqamət əmək bazarı ilə real əməkdaşlıqdır. Kolleclər öz regionlarında fəaliyyət göstərən müəssisə və şirkətlərlə tərəfdaşlıq müqavilələri imzalayaraq tələbələrin istehsalat təcrübələrini, hətta “dualist təhsil” modelini formalaşdırmalıdırlar. Bu zaman tələbə həm təhsil alır, həm də gələcək iş mühitini yerində tanıyır.
Üçüncü məsələ məlumatlandırmadır. Tələbələr üçün ixtisas seçimi mərhələsində peşə yönümü testləri, ixtisasların perspektivləri, əmək bazarındakı maaş səviyyələri və tələbat göstəriciləri barədə açıq məlumat platformaları yaradılmalıdır. Gənclər ixtisası sadəcə qəbul olunmaq üçün deyil, gələcək peşə kimliyini qurmaq üçün seçməlidirlər.
Nəticə etibarilə, kolleclərin missiyası yalnız “diplom verən” deyil, “peşə yetişdirən” təhsil müəssisəsinə çevrilməlidir. Bunun üçün həm tədris məzmununda çeviklik, həm də təhsil və bazar arasında real körpü qurmaq vacibdir".
