Taylandın Mae Hong Son əyalətində yerləşən Pha Daeng Cave mağara sistemində elmə məlum olmayan yeni bir çoxayaqlı növ - Desmoxytes chaofa kəşf edilib. Alimlər bu canlıya onun görünüşünə görə “əjdaha” ləqəbi veriblər.
AzEdu.az-ın xarici mediadan əldə etdiyi məlumata görə, kəşf beynəlxalq bioloqlar qrupuna məxsusdur. Yeni növ uzun, tikanlı bədəni və parlaq çəhrayı rəngi ilə fərqlənir. Onun forması qədim əfsanələrdəki “əjdaha” obrazını xatırladır.
Tədqiqatçılar bildiriblər ki, bu tapıntı yeraltı ekosistemlərin hələ tam öyrənilmədiyini və burada saysız-hesabsız yeni canlı növlərinin mövcud ola biləcəyini göstərir. Onların fikrincə, mağara kimi qapalı mühitlərdə yaşayan canlılar çox vaxt unikal morfoloji xüsusiyyətlər qazanır.
Desmoxytes chaofa növünün aşkar edilməsi həm biomüxtəlifliyin qorunması, həm də ekoloji tarazlıq baxımından mühüm əhəmiyyət daşıyır. Alimlər yeni növün populyasiya vəziyyətini izləmək və onun yaşayış mühitinin qorunması üçün xüsusi tədqiqatların davam etdiriləcəyini qeyd ediblər.
