Hindistanın Çennay şəhərində xarici ölkələrdə təhsil almaq istəyən şagirdlərin və tələbə namizədlərinin sayında ötən illə müqayisədə 30 faiz azalma qeydə alınıb.
AzEdu.az xarici mediaya istinadən xəbər verir ki, təhsil məsləhətçiləri bu azalmanı əsasən ABŞ və Birləşmiş Krallıqda tətbiq edilən viza məhdudiyyətləri və post-təhsil iş imkanlarının azalması ilə əlaqələndirirlər. Xüsusilə ABŞ vizalarında son aylarda müşahidə olunan gecikmələr və rədd halları, valideynlər və tələbələr arasında narahatlıq yaradıb.
“Əvvəllər hər 10 müraciətdən 7-si ABŞ və Birləşmiş Krallığa yönəlirdi. İndi isə bu rəqəm 4-ə düşüb,”- deyə Çennayda fəaliyyət göstərən təhsil məsləhətçisi Ravi Subramanian bildirib. Digər tərəfdən, İngiltərənin iş vizalarına dair yeni qaydaları səbəbilə məzun olan tələbələrin orada qalmaq və işləmək şansı da azalıb. Bu isə həmin ölkələrdə təhsil almağın uzunmüddətli faydalarını sual altına salıb.
Bundan əlavə, artan təhsil və yaşam xərcləri, eləcə də valyuta məzənnəsindəki dəyişikliklər valideynləri daha iqtisadi və alternativ seçimlər axtarmağa vadar edir. Nəticədə, Kanada, Avstraliya, Almaniya və BƏƏ kimi ölkələrə maraq artıb.
