“Abşeron rayonu Qobu qəsəbəsinin Ə.İbrahimov adına 2 nömrəli tam orta məktəbinin şagirdləri ilə birlikdə Ekologiya və Təbii Sərvətlər Nazirliyinin dəstəyi ilə Sumqayıt şəhərində sahilyanı ərazidə əsl ekoloji həmrəylik nümayiş etdirdik”.
Bu barədə Milli Məclisin deputatı Nigar Məmmədova AzEdu.az-a məlumat verib. Deputat qeyd edib ki, Sumqayıt şəhəri sahilyanı ərazisinin tullantılardan təmizlənməsi aksiyasının əsas məqsədi Xəzər dənizinin biomüxtəlifliyinin mühafizəsinə töhfə vermək, ərazilərin məişət tullantılarından təmizlənməsini təmin etmək, ətraf mühitin qorunması və ictimai şüurun artırılması istiqamətində məktəbliləri maarifləndirməkdir.
“Uşaqların böyük həvəslə bu işdə iştirak etməsi göstərdi ki, gələcəyimiz olan gənc nəsil təbiətə biganə deyil. Biz inanırıq ki, bu kimi aksiyalarla həm ekoloji şüur formalaşacaq, həm də hər bir uşaq ətraf mühitin qorunmasında özünü məsuliyyətli vətəndaş kimi hiss edəcək”, – deyə o vurğulayıb.
