ABŞ Prezidenti Donald Tramp 21 sentyabr 2025-ci il tarixində imzaladığı fərmanla H-1B işçi vizası üçün ödənişi 100.000 ABŞ dollarına yüksəldib. Bu dəyişiklik yalnız yeni vizaya müraciət edənlərə şamil olunur və mövcud viza sahiblərinə aid deyil.
AzEdu.az xarici mediadaya istinadən xəbər verir ki, H-1B vizası beynəlxalq tələbələr üçün iş imkanları və təcrübə proqramlarının önəmli vasitəsi olduğundan, bu artım onların ABŞ-də təhsil sonrası iş imkanlarını əhəmiyyətli şəkildə məhdudlaşdıra bilər. Ekspertlər bildirirlər ki, yüksək ödəniş tələbələrin ABŞ-yə yönəlməsini çətinləşdirəcək və bir çoxu alternativ ölkələrdə təhsil və iş imkanları axtarmağa məcbur olacaq.
Hindistan hökuməti də bu qərarı narahatlıqla qarşılayıb və bunun tələbələr və ailələr üzərində mənfi təsirlər yaradacağını bildirib. Şirkətlər isə yeni ödənişi nəzərə alaraq, beynəlxalq tələbələr üçün alternativ iş imkanları və uzaqdan işləmə modelləri hazırlamağa başlayıblar.
Bu dəyişiklik ABŞ-də beynəlxalq tələbələr üçün təhsil və karyera imkanlarına ciddi təsir göstərəcək və universitetlər ilə təhsil müəssisələrinin strategiyalarını yenidən nəzərdən keçirməsinə səbəb olacaq.
