Hindistanın Maharaştra ştatında 2026-cı ilin iyun ayından etibarən məktəb şagirdləri üçün kənd təsərrüfatı dərsləri tədris proqramına daxil ediləcək. Bu barədə Maharaştra Təhsil Nazirliyi rəsmi açıqlama yayıb.
AzEdu.az xarici mənbədən aldığı məlumata əsasənn xəbər verir ki, tədris proqramı torpaq elmi, əkinçilik, suvarma, aqrar texnologiya, bitki mühafizəsi, bağçılıq və heyvandarlıq kimi mövzuları əhatə edəcək. Məqsəd, şagirdlərin kənd təsərrüfatının əhəmiyyətini başa düşməsini təmin etmək və onları bu sahədə peşəkar yollara hazırlamaqdır. Proqram həmçinin yerli kənd ənənələri, incəsənət və coğrafiya ilə inteqrasiya olunacaq.
Bu təşəbbüs Hindistanın milli təhsil siyasəti olan NEP 2020 ilə uyğun həyata keçirilir və şagirdlərin kənd təsərrüfatı sahəsində praktiki biliklər əldə etmələrini hədəfləyir. Nazirlik bildirir ki, dərslərin hazırlanmasında mütəxəssislər iştirak edəcək və texnologiyadan da geniş istifadə olunacaq.
Beləliklə, Maharaştra ştatı, kənd təsərrüfatının gələcək nəsillər tərəfindən daha yaxşı başa düşülməsi və inkişaf etdirilməsi üçün məktəb təhsilində yeni imkanlar yaradır.
