Fransanın Marsel şəhərində yerləşən “La Valentine” yeniyetmələr üçün penitensiar müəssisəsi (EPM) çox sayda tənqid və narahatlıqların mərkəzindədir. Paris senatoru və ekoloq siyasətçi Ann Suyris müəssisəni xəbərdar etmədən ziyarət edib. Onun səfəri yay aylarında nəzarət orqanı tərəfindən yayımlanan tənqid dolu hesabatdan sonra baş tutub. Hesabatda müəssisədə saxlanılan yeniyetmələrin insan ləyaqətini alçaldan şəraitdə yaşadığı qeyd olunurdu.
AzEdu.az xəbər verir ki, senator Ann Suyris parlament üzvü kimi ziyarət hüququndan istifadə edərək, Marselin XI rayonunda yerləşən “La Valentine” həbsxanasına gəldiyini bildirib.
“Oxuduğum hesabatdan sonra vəziyyətin necə düzələcəyini düşünə bilmirəm. Buranın tam bağlanması və yenidən qurulması lazımdır”, -deyə o vurğulayıb. Qeyd edib ki, həmin müəssisədə 13-18 yaş arası 38 oğlan ya artıq məhkum olunub, ya da məhkəməni gözləyir. Senator müəssisənin direktor müavini ilə birlikdə bəzi məhbusların kameralarına baxış keçirib.
“Bura bağlanmalıdır. Baxın, təmiz deyil. Qalın yorğanlarımız yoxdur”,- deyə yeniyetmə məhbus onun kamerasını ziyarət edəndə deyib. Kamerada boyaların töküldüyü, divarların qraffiti ilə dolu olduğu, sanitar qovşaqların təmizlənmədiyi vurğulanıb.
Müəssisənin direktor müavini bildirib ki, hesabatdan sonra tədbirlər görülüb, əlavə maliyyə ayrılıb. Lakin senator Ann Suyris bunun yetərli olmadığını görüb. Onun sözlərinə görə, təmir işləri problemi kökündən həll etmir. O, eyni zamanda təhsil və reabilitasiya fəaliyyətlərinin azlığını, eləcə də kadr çatışmazlığını xüsusi qeyd edib. Məlumata görə, “La Valentine” həbsxanasında personalın 20%-i çatışmır.
Bu vəziyyət Fransada yeniyetmə məhbusların hüquqlarının və şəraitinin nə dərəcədə qorunduğu məsələsini yenidən gündəmə gətirir. Qeyd olunan nöqsanlar – sanitar şəraitsizlik, təhsil imkanlarının yoxluğu və kadr azlığı – bu müəssisənin reabilitasiya missiyasına uyğun gəlmədiyini göstərir.
Senatorun fikrincə, həll yolu sadəcə kosmetik dəyişikliklər deyil, tam islahat və ya müəssisənin bağlanaraq yenidən qurulmasıdır.
“La Valentine” həbsxanası Fransada yeniyetmələr üçün nəzərdə tutulan cəza siyasətinə dair ciddi suallar doğurur. Məqsəd cəza yox, bərpa olmalıdır – lakin mövcud şərait bu məqsəddən uzaq görünür”, - deyə o bildirib.
