Britaniyada yeni tədris ili başlanmasına baxmayaraq, köhnə problemlər hələ də həll olunmayıb. Ölkədə dövlət məktəblərinin 25 faizindən çoxunda ixtisaslı fizika müəllimi yoxdur. Bu vəziyyət xüsusilə sosial-iqtisadi cəhətdən zəif bölgələrdə özünü daha kəskin göstərir.
AzEdu.az xarici mənbədən aldığı məlumata əsasən xəbər verir ki, müəllim çatışmazlığına səbəb kimi aşağı maaşlar, iş yükünün çoxluğu və yüksək istefa göstəriciləri göstərilir. Təhsil ekspertləri bildirirlər ki, bu problem yalnız fizika fənninə deyil, ümumilikdə STEM sahələrində şagirdlərin inkişafına ciddi təsir göstərir.
Bölgələr arasında da bərabərsizlik artır. Londonla müqayisədə şimal-şərq bölgələrində şagirdlər təhsil imkanlarından daha az yararlana bilir. COVID-dən sonrakı illərdə müşahidə olunan təhsil fərqinin daralması tendensiyası da yenidən əks istiqamətə dəyişib.
Mütəxəssislər vəziyyətin aradan qaldırılması üçün hökumətin əlavə maliyyə dəstəyi göstərməsinin və uzunmüddətli müəllim hazırlığı proqramları həyata keçirməsinin vacib olduğunu bildirirlər.
