Azərbaycan rəqəmsal transformasiyanı milli prioritet elan edib. Hədəfimiz istedadları inkişaf etdirmək, qabaqcıl bacarıqları gücləndirmək və innovativ, təhlükəsiz, qlobal rəqabətədavamlı rəqəmsal ekosistem qurmaqdır. Bu gün ölkəmizin gəncləri proqramlaşdırma, süni intellekt, kibertəhlükəsizlik və digər qabaqcıl sahələrdə geniş imkanlara sahibdir.
AzEdu.az xəbər verir ki, bunu rəqəmsal inkişaf və nəqliyyat nazirinin müavini Samir Məmmədov 49-cu ICPC Dünya Finalının açılışında deyib.
“Bu baxışımız əsas milli çərçivələr tərəfindən yönləndirilir: Rəqəmsal İnkişaf Konsepsiyası, İnformasiya Təhlükəsizliyi və Kibertəhlükəsizlik üzrə Milli Strategiya və Süni İntellekt üzrə Milli Strategiya. Bu sənədlər yüksəkixtisaslı İKT mütəxəssislərinin hazırlanması, gənc nəsil arasında rəqəmsal savadlılığın artırılması, təhlükəsiz və innovativ rəqəmsal mühitin yaradılması, Azərbaycan istedadlarının və mütəxəssislərinin qlobal arenada daha geniş tanıdılması kimi hədəflər üçün möhkəm təməl yaradır.
Bu təşəbbüslər yüksəkkeyfiyyətli xidmət və məhsullar təqdim edə bilən, beynəlxalq bazarda uğurla rəqabət aparan yerli IT mütəxəssislərinin yetişdirilməsinə yönəlib. Məqsədimiz ölkənin İKT ixracını gücləndirməkdir.
Bu baxışı reallığa çevirmək üçün biz dünya miqyasında tanınan tərəfdaşlarla sıx əməkdaşlıq edirik. “Harbour Space University” və “StrategEast” kimi nüfuzlu qurumlarla birgə beynəlxalq təcrübəni yerli ambisiyalarla birləşdirən proqramlar həyata keçiririk və yeni nəsil İKT liderlərinin formalaşmasına dəstək oluruq.
Eyni zamanda, gənclərimizə öyrənmək, inkişaf etmək və dünya texnologiya liderləri ilə əlaqə qurmaq imkanı verən mərkəzlər yaradırıq. “Technion” ilə birlikdə yaradılan Azərbaycan Kibertəhlükəsizlik Mərkəzi, “EPAM Systems” şirkətinin yerli mərkəzi və “Andersen” ilə əməkdaşlıq çərçivəsində həyata keçirilən yeni proqramlar gənclərimizə beynəlxalq səviyyəli təlimlərdən faydalanmaq, praktiki bacarıqlar qazanmaq və yüksək standartlara cavab verən karyera qurmaq imkanı verir.
İKT sektorunun inkişafı və gənc istedadların dəstəklənməsi üzrə həyata keçirdiyimiz təşəbbüslər beynəlxalq səviyyədə də öz təsirini göstərir. Bu tərəqqinin ən yaxşı nümunələrindən biri Azərbaycanın ICPC yarışlarında iştirakıdır”, - deyə S.Məmmədov əlavə edib.
