Yay aylarında hava şəraitinin dəyişməsi, səyahətlərin artması və qidalanma rejiminin pozulması uşaqların sağlamlığında müəyyən problemlərə səbəb ola bilər.
AzEdu.az-ın əldə etdiyi məlumata əsasən, xüsusilə bu dövrdə bəzi xəstəliklərin yayılma riski artır və valideynlərin bu xəstəliklər haqqında məlumatlı olması önəm daşıyır.
1. İshal və qida zəhərlənməsi
Yayda yüksək temperatur bakteriyaların daha sürətli çoxalmasına səbəb olur. Qida məhsullarının düzgün saxlanılmaması və çirkli əllərlə yeyilməsi ishal və zəhərlənmə hallarını artırır. Bu, xüsusilə azyaşlı uşaqlarda ciddi maye itkisinə və halsızlığa səbəb ola bilər.
2. Günvurma və istilik vurması
Uşaqların uzun müddət birbaşa gün şüaları altında qalması onların orqanizmində istilik balansını poza bilər. Bu isə baş ağrısı, ürəkbulanma, halsızlıq və bəzən də huşun itməsi ilə nəticələnə bilər.
3. Tənəffüs yolu infeksiyaları
Soyuq içkilərin həddindən artıq qəbulu və kondisioner altında uzun müddət qalmaq uşaqlarda boğaz ağrısı, öskürək və digər respirator infeksiyalara səbəb ola bilər.
4. Dəri infeksiyaları və allergiyalar
Yayda hovuz istifadəsi, çox tərləmə və gigiyenaya düzgün riayət edilməməsi dəri göbələkləri və allergik reaksiyalara yol aça bilər. Xüsusilə də həssas dəriyə malik uşaqlar bu baxımdan daha risk altındadır.
5. Göz infeksiyaları
Hovuz və ya dəniz suyunun gözdə qalması, gigiyena qaydalarına riayət edilməməsi konjonktivit kimi infeksiyaların yayılmasına səbəb olur. Bu isə gözlərin qızarması, sulanması və qaşınması ilə müşahidə edilir.
6. Zökəm və soyuqdəymə
İsti hava insanlarda soyuqdəymə riskini azaltsa da, ani temperatur dəyişiklikləri (kondisionerdən çıxıb isti havaya düşmək və ya əksi) uşaqlarda zökəmə yol aça bilər.
Valideynlər yay aylarında uşaqların sağlamlığını qorumaq üçün bəzi əsas məqamlara xüsusi diqqət yetirməlidirlər. İlk növbədə, uşaqların gün ərzində kifayət qədər su içmələri təmin olunmalıdır. Onların qidaları təzə və gigiyenik şəraitdə hazırlanmalı, açıq havada və ya istidə uzun müddət saxlanılan qidalardan uzaq tutulmalıdır.
Eyni zamanda, günün ən isti saatlarında – xüsusilə 12:00-dan 16:00-a qədər – uşaqların birbaşa günəş altında qalmasına yol verilməməlidir. Əgər kondisionerdən istifadə olunursa, otaqla çöl havası arasında kəskin temperatur fərqi yaranmamasına diqqət yetirilməlidir.
Uşaqlar hovuz və ya dənizdən istifadə etdikdən sonra dərhal yuyundurulmalı, göz və dəri gigiyenası qorunmalıdır. Xüsusilə açıq havada olan zaman uşaqlara baş geyimi geyindirilməsi, onların yüngül, tər çəkən geyimlərə üstünlük verməsi vacib şərtlərdəndir.
Bütün bu qaydalara əməl edilməsi uşaqların yay fəsli ərzində sağlam və təhlükəsiz şəkildə istirahət etməsinə imkan yaradacaq.
