Son illərdə süni intellekt (AI) təhsil sahəsində sürətlə yayılır, lakin bütün ölkələr və məktəblər bu yeni texnologiyanı eyni dərəcədə qəbul etmir. AzEdu.az bu ölkələrlə bağlı araşdırma aparıb.
Afrika və Cənubi Asiyada texnologiyadan uzaq məktəblər
Məsələn, Afrikanın Efiopiya və Cənubi Sudan kimi ölkələrində çoxlu məktəblər internet və kompüter infrastrukturunun olmaması səbəbindən süni intellektdən istifadə edə bilmir. Burada təhsil daha çox ənənəvi kitablar və müəllimlərin şagirdlərlə apardığı dərslər üzərində qurulub. Bu ölkələrdə təhsil sistemində AI‑nin rolu hələ minimal səviyyədədir.
Eyni zamanda Hindistan və digər Cənubi Asiya ölkələrində “rote learning” (yaddaş üzərində tədris) modeli çox geniş yayıldığından, süni intellektə adaptasiya gecikir. Belə sistemlərdə hələ də test və imtahanların böyük əksəriyyəti müəllimlərin və şagirdlərin ənənəvi üsullarla hazırlığına əsaslanır.
Avstraliyada “Digital Detox” məktəbləri
Bunun əksinə olaraq Avstraliyada bir sıra məktəblər texnologiyadan müvəqqəti imtina modelləri tətbiq edir. Məsələn, St Ignatius’College kimi məktəblərdə “Digital Detox Days” adlı həftəlik texnologiyasız dərs günləri keçirilir. Məqsəd şagirdlərin yazılı ifadə bacarıqlarını və diqqətini artırmaq, süni intellekt və digər texnoloji asılılıqlardan uzaqlaşdırmaqdır.
Avropada süni intellektə qanuni məhdudiyyətlər
Bəzi Avropa ölkələrində isə imtahan və qiymətləndirmə proseslərində süni intellekt vasitələrinin istifadəsi qadağan edilib. İngiltərə, Latviya və İsveç kimi ölkələrdə generativ AI-nın imtahanlarda istifadə olunması rəsmi olaraq yolverilməz sayılır.
