Hindistanda gənclərin 53 faizinin şəxsi və sosial inkişaf baxımından çatışmazlıqlar yaşadığı üzə çıxıb. Bu, ölkənin Nagpur şəhərində keçirilən “Emerging Adulthood” adlı konfransda təqdim olunan genişmiqyaslı tədqiqatın nəticəsidir.
AzEdu.az-ın xarici mənbədən aldığı məlumata əsasən, araşdırmanı SEARCH təşkilatının NIRMAN bölməsi 2021–2024-cü illərdə 18–29 yaş arası 4 minə yaxın gənc arasında aparıb. Qiymətləndirmə gənclərin yeddi əsas sahədəki inkişaf səviyyəsini ölçüb: fiziki və zehni sağlamlıq, xarakter və dəyərlər, münasibətlər, peşə inkişafı, həyat bacarıqları və cəmiyyətə töhfə. Ən azı bu sahələrin 5-ində zəif nəticə göstərən gənclər “şəxsiyyət çatışmazlığı” kateqoriyasına daxil edilib.
Tədqiqatın müəlliflərindən biri olan həkim Amrut Bang bildirib ki, uşaqlar üçün boy və çəki ilə ölçülə bilən inkişaf göstəriciləri mövcuddur, lakin gənclər üçün şəxsiyyət və həyat hazırlığı sahəsində belə bir sistem hələ də qurulmayıb. “Biz bu boşluğu doldurmaq üçün ilk dəfə olaraq ölçülə bilən model təqdim etdik”, – deyə o qeyd edib.
Məlumatlara əsasən, respondentlərin yalnız 9 faizi bütün sahələr üzrə balanslı inkişaf nümayiş etdirib. Bu isə Hindistanda gənclərin intellektual deyil, əsasən emosional və sosial inkişafda çətinliklər yaşadığını göstərir.
Tədqiqat mütəxəssisləri hesab edir ki, bu nəticələr Hindistan təhsil sistemində həyat bacarıqları və sosial-emosionallıq üzərində daha ciddi işlənilməsinin zəruri olduğunu ortaya qoyur. Gənclərin yalnız biliklə deyil, həm də şəxsiyyət və mənəvi dayanıqlıq baxımından inkişafı üçün proqramlara ehtiyac olduğu vurğulanır.
