ABŞ-də Prezident Donald Tramp administrasiyası tərəfindən bir müddət dayandırılmış təxminən 6 milyard dollar dəyərində federal təhsil qrantları yenidən sərbəst buraxılıb. Qərar 2025-ci ilin iyul ayının son həftəsində qüvvəyə minib.
AzEdu.az xarici mənbədən aldığı məlumata əsasən xəbər verir ki, açıqlamaya görə, bu vəsaitlər əsasən dil öyrənmə proqramları, müəllimlərin peşəkar inkişafı və böyüklər üçün təhsil təşəbbüslərini əhatə edəcək. Təhsil Departamenti bu vəsaitlərin ştatlar üzrə paylanması üçün planlama işlərinə başlayıb. Məlumata görə, Texas, Florida və New York kimi böyük ştatlarda artıq təhsil idarələri proqramların bərpası üçün təlimat və büdcə ayırmalarını müzakirə edir.
Mütəxəssislər bildirir ki, bu qərar məktəblərdə təhsil keyfiyyətinin yüksəldilməsinə, aşağı gəlirli ailələrin uşaqları üçün əlavə dəstək imkanlarının artırılmasına və müəllimlərin bacarıqlarının təkmilləşdirilməsinə töhfə verəcək.
Qeyd edək ki, Tramp administrasiyası bu qrantları iyunun əvvəllərində bəzi prosedur və nəzarət səbəbləri ilə dayandırmışdı. Lakin son dövrlərdə təhsil ictimaiyyətindən və valideyn birliklərindən gələn təzyiqlər fonunda qərar dəyişdirilib.
Məsələ ilə bağlı ABŞ Təhsil Departamentindən verilən açıqlamada qeyd olunur ki, qrantların sərbəst buraxılması ali və orta təhsil müəssisələrinin inkişafını sürətləndirməyə yönəlib və proqramların tətbiqinə dair təlimatlar yaxın günlərdə rəsmi şəkildə açıqlanacaq.
