Kanada hökuməti 2025-ci ilin sentyabrından etibarən xarici tələbələrin təhsil vizası üçün maliyyə tələblərini artıracaq. Yeni qaydalara əsasən, tələbələr təhsil müddətində yaşayış xərclərini ödəyə biləcəyini sübut etməlidirlər.
AzEdu.az-ın xarici mediadan əldə etdiyi məlumata görə, yeni maliyyə tələblərinə görə, tək bir tələbə üçün illik minimum məbləğ 22,895 Kanada dolları olacaq ki, bu da əvvəlki 20,635 dollardan 2,260 dollar çoxdur. Ailə üzvləri ilə müraciət edənlər üçün bu məbləğ daha da yüksəlir. Məsələn, iki nəfərlik ailə üçün 28,502 CAD, üç nəfər üçün isə 35,040 CAD tələb olunacaq.
Maliyyə sübutları arasında Kanadada açılmış bank hesabı, zəmanətli investisiya sertifikatı (GIC), bank çıxarışları, təhsil krediti sənədləri, sponsor məktubu və ya təqaüd sübutları qəbul edilir.
Hökumət rəsmiləri bildirirlər ki, bu dəyişikliklər tələbələrin maliyyə vəziyyətini gücləndirmək və təhsil müddətində yaşayış xərclərini qarşılama qabiliyyətini təmin etmək məqsədi daşıyır.
