Cənubi Koreya hökuməti beynəlxalq tələbə axınının azalmasının qarşısını almaq və 2027-ci ilə qədər ölkədəki xarici tələbə sayını 300 min nəfərə çatdırmaq məqsədilə yeni təşəbbüslər həyata keçirir.
AzEdu.az xarici mənbədən aldığı məlumata əsasən xəbər verir ki, yeniliklərə əsasən, xarici tələbələr üçün təhsil sonrası qalma müddəti 6 aydan 3 ilədək uzadılacaq. Bu dəyişiklik məzunların Koreyada iş tapmasına və ölkədə daha uzun müddət qalmasına imkan yaradacaq.
Tələbələrin həftəlik iş saatı da artırılıb: bakalavr və dil proqramı tələbələri üçün 25, magistr və doktorantura səviyyəsində isə 35 saat müəyyən olunub. Tətil dövrlərində isə iş saatlarına məhdudiyyət qoyulmur.
Təhsil vizası üçün tələb olunan maliyyə tələbləri də yumşaldılıb. Əvvəllər tələb olunan 20 min ABŞ dolları, yeni qaydalara əsasən 15 400 dollara endirilib.
Hökumət STEM sahəsində təhsil alan tələbələrə prioritet verəcək. Onlar üçün daimi yaşayış icazəsinin verilməsi asanlaşdırılacaq və təqaüd yerlərinin sayı artırılacaq.
Bu addımlar Cənubi Koreyanın beynəlxalq tələbə bazarında mövqeyini gücləndirmək və xarici gəncləri ölkədə saxlamaq strategiyasının bir hissəsidir.
