Çinin şərq əyalətlərində hökm sürən intensiv istilər tələbələri və universitet rəhbərliyini fövqəladə tədbirlər görməyə məcbur edib. Temperaturun 40°C-ni keçdiyi bəzi bölgələrdə tələbələr kondisionerli kitabxanalarda gecələməyə başlayıblar.
AzEdu.az-ın xarici mediadan əldə etdiyi məlumata görə, Şandun əyalətinin Çindao şəhərində temperatur 40.5°C-yə çataraq, bölgədə tarixdə qeydə alınan ən yüksək göstəriciyə yaxınlaşıb. Hazırda əyalətdəki altı universitet, o cümlədən Çindao Universiteti və Yantai Nanshan Universiteti yay tətilindən istifadə edərək yataqxanaları kondisionerlərlə təchiz edir. Yantai Nanshan Universitetində isə tələbələrə kitabxanalarda gecələməyə icazə verilib.
Çindao Universitetində bir tələbə günvurma diaqnozu ilə xəstəxanaya yerləşdirilib. Universitetdə yataqxana nəzarətçisi vəfat edib, lakin bu hadisənin birbaşa istiylə bağlı olub-olmadığı hələlik təsdiqlənməyib.
İstilik dalğası səbəbindən Hənan və Şandun əyalətlərində ümumilikdə 28 bölgə ən yüksək təhlükə siqnalı olan qırmızı xəbərdarlıq yayımlayıb. Bununla yanaşı, ölkə üzrə elektrik enerjisi tələbatı 1.47 milyard kilovatla rekord həddə çatıb. Sakinlər və tələbələr supermarketlər, kitabxanalar və digər kondisionerli məkanlara sığınaraq istidən qorunmağa çalışırlar.
Mütəxəssislər bu vəziyyətin iqlim dəyişikliyi ilə bağlı olduğunu bildirir və istilərin davamlı xarakter alacağından narahatdırlar. The Lancet jurnalının məlumatına görə, yalnız 2022-ci ildə ölkədə istilə əlaqəli səbəblərdən 50 mindən çox insan həyatını itirib.
Hazırda universitet rəhbərlikləri tələbələrin sağlamlığını qorumaq üçün əlavə tədbirlər görür və gələcəkdə daha dayanıqlı soyutma sistemlərinin qurulması zərurəti gündəmə gəlib.
