Avstraliya hökuməti beynəlxalq tələbələr üçün viza müraciət haqlarını artıraraq, 1 iyul 2025 tarixindən etibarən tələbə vizasının qiymətini 1,600 Avstraliya dollarından 2,000 dollaradək yüksəldib. Bu qərar ölkədə təhsil məqsədilə gələn əcnəbilərin sayını məhdudlaşdırmaq məqsədi daşıyır.
AzEdu.az-ın xarici mediadan əldə etdiyi məlumata görə dəyişiklik Avstraliyanın Daxili İşlər Nazirliyi tərəfindən təsdiqlənib və əsas motivasiya kimi təhsil vizasından sui-istifadənin qarşısını almaq, eyni zamanda ölkənin miqrasiya siyasətini sərtləşdirmək göstərilib.
"Vizanın qiymətindəki artım, ölkəyə real təhsil niyyəti ilə gəlməyən şəxslərin qarşısını almaq üçündür," – deyə nazirlik rəsmisi bildirib.
Mütəxəssislər hesab edirlər ki, bu artım xüsusilə Asiya və Afrika ölkələrindən gələn tələbələrə mənfi təsir göstərə bilər. Eyni zamanda Avstraliya universitetlərinin beynəlxalq tələbə axınında azalma ilə üzləşəcəyi proqnozlaşdırılır.
Avstraliya universitetləri üçün beynəlxalq tələbələr əsas gəlir mənbələrindən biridir. Təhsil sektorunda çalışan ekspertlər, bu artımın həm akademik cəlbediciliyə, həm də ölkənin iqtisadi təhsil ixracına mənfi təsir göstərə biləcəyindən ehtiyat edirlər.
