ABŞ-də tələbə vizaları ilə bağlı mühüm dəyişiklik gündəmdədir. Keçmiş prezident Donald Trump-un rəhbərlik etdiyi administrasiya, beynəlxalq tələbələr üçün tətbiq olunan “açıq uclu” (open-ended) vizaların müddətini məhdudlaşdırmağı təklif edib.
AzEdu.az xarici mediadan əldə etdiyi məlumata əsasən xəbər verir ki, xarici tələbələr üçün F və J tipli vizalara sabit müddət qoyulması nəzərdə tutulur. Bu dəyişiklik ABŞ-də təhsil alan yüz minlərlə tələbəyə, xüsusilə də hindli və çinli tələbələrə birbaşa təsir göstərə bilər.
Hazırda ABŞ-də təhsil alan hindli tələbələrin sayı 420 000-ə yaxındır. Yeni sistemin tətbiqi bu tələbələrin viza müddəti bitdikdən sonra ölkəni tərk etməsini, viza yeniləmə prosesində əlavə tələblərlə üzləşməsini və ABŞ-yə yenidən girişdə çətinliklərlə qarşılaşmasını mümkün edir.
ABŞ Daxili Təhlükəsizlik Nazirliyi dəyişiklikləri tələbə vizası sisteminin “sui-istifadəyə” qarşı daha dayanıqlı hala gətirilməsi məqsədi ilə əsaslandırır. Təklif olunan qaydalar, ölkədə uzun müddət qalan tələbələrin hüquqi statusunu daha ciddi nəzarətdə saxlamağı hədəfləyir.
Təklif beynəlxalq tələbələr arasında narahatlığa səbəb olub. Hindistanın Xarici İşlər Nazirliyi məsələni diqqətlə izlədiyini açıqlayıb. Eyni zamanda, ABŞ-nin bir sıra universitetləri də narazılıq bildirərək bu qərarın beynəlxalq təhsilə və ölkənin iqtisadi maraqlarına zərər vuracağını deyirlər.
Qeyd edək ki, bu dəyişikliklər hələlik təklif mərhələsindədir və qəbul olunarsa, 2026-cı ildən qüvvəyə minə bilər.
