İrlandiya hökuməti məktəbəqayıdış üçün verilən geyim və ayaqqabı təqaüdünü (Back to School Clothing and Footwear Allowance – BSCFA) daha çox ailəni əhatə edəcək şəkildə genişləndirib. Yeni qaydalara əsasən, əlavə olaraq təxminən 2 300 uşaq bu dəstəkdən yararlana biləcək.
AzEdu.az-ın xarici mediadan əldə etdiyi məlumata əsasən, Sosial Müdafiə Nazirliyi tərəfindən elan edilən dəyişikliklərə görə, artıq uşaq himayədarları (foster carers) da bu proqram çərçivəsində təqaüd almaq hüququna malik olacaqlar. Hökumət bu addımı sosial bərabərliyi təşviq etmək və himayədar ailələrin artan xərclərini qarşılamaq məqsədi ilə atdığını bildirib.
Təqaüd məbləğləri aşağıdakı kimidir:
4–11 yaş arası uşaqlar üçün: €160
12–22 yaş arası şagird və tələbələr üçün: €285
Proqramın əsas məqsədi az təminatlı və sosial həssas ailələrin yeni dərs ilinə hazırlığını dəstəkləmək, məktəb geyimləri və digər zəruri avadanlıqların alınmasını asanlaşdırmaqdır. Ərizələrin qəbulu iyul ayının ortalarına qədər davam edəcək və ödənişlər avqust ayının əvvəlində həyata keçiriləcək.
İrlandiya Sosial Müdafiə Nazirliyinin nümayəndəsi bildirib ki, yeni qaydalar daha çevik və ədalətli şəkildə tətbiq olunacaq:
“Məqsədimiz odur ki, məktəbə başlamaq hər bir uşaq üçün bərabər imkanlarla mümkün olsun. Bu dəyişiklik ailələrin üzərindəki maliyyə yükünü azaltmağa xidmət edir.”
Hazırda bu proqramdan təxminən 120 min uşaq yararlanır və rəsmilərin proqnozlarına görə, bu rəqəm artmağa davam edəcək.
